الەمدىك ب ا ق-تاعى قازاقستان: جاڭا ەلشىلىك، اتوم ەنەرگياسىن ءوندىرۋ مەن «جاسىل ءدالىز»

قاراشانىڭ بەل ورتاسىنا اۋعان تۇستا جاھانداعى اقپارات قۇرالدارى قازاقستان جونىندە ءبىراز جاڭالىقتاردى ءبولىستى. اسىرەسە، استانادا مولدوۆا ەلشىلىگىنىڭ اشىلاتىنى، ەلىمىزدىڭ اتوم ەنەرگياسى ءوندىرىسىن ارتتىرۋعا تالپىنىسى، قازاق- وزبەك- ازەربايجاننىڭ بىرلەسكەن جاڭا جوباسى تۋرالى كوبىرەك جازىلىپتى. سونداي- اق قازاقستان ازيا وليمپيادالىق كەڭەسىنە قوسىلۋدا. تولىعىراق Kazinform ءتىلشىسىنىڭ شولۋىنان وقىڭىز.

Anadolu: 2025 -جىلى قازاقستاندا مولدوۆا ەلشىلىگى اشىلادى

بۇعان دەيىن مولدوۆا ماسكەۋدەگى ەلشىلىگى ارقىلى قازاقستانمەن قارىم-قاتىناس ورناتىپ كەلگەن ەدى. وسى ورايدا مولدوۆا پرەزيدەنتى مايا ساندۋ كەلەسى جىلى قازاقستاننىڭ ەلورداسىندا ەلشىلىك اشىلاتىنىن حابارلادى. جاڭالىقتى Anadolu اگەنتتىگى ءبولىستى.

اقوردانىڭ دەرەگىنە ۇڭىلسەك، ازەربايجان استاناسى باكۋدە وتكەن ب ۇ ۇ-نىڭ كليماتتىڭ وزگەرۋى تۋرالى نەگىزدەمەلىك كونۆەنتسياسىنىڭ 29-جيىنىندا قاسىم-جومارت توقايەۆ مولدوۆالىق ارىپتەسى ساندۋمەن كەزدەسكەن.

كەزدەسۋ بارىسىندا قازاقستان مەن مولدوۆا اراسىنداعى دوستىق قارىم-قاتىناستاردى جاقسارتۋ مۇمكىندىكتەرى تالقىلانىپ، جوعارى دەڭگەيدەگى ءوزارا ساپارلاردى ۇيىمداستىرۋ تۋرالى ۋاعدالاستىققا قول جەتكىزىلدى.

ساندۋ 2025 -جىلى ءوز ەلىنىڭ استاناداعى ەلشىلىگى اشىلاتىنىن جانە بۇل ەكىجاقتى ىنتىماقتاستىقتى ودان ءارى دامىتۋعا ىقپال ەتەتىنىن مالىمدەگەن. جالپى، كەڭەس وداعى ىدىراعاننان كەيىن ءوز تاۋەلسىزدىگىن جاريالاعان قازاقستان مەن مولدوۆا اراسىنداعى ديپلوماتيالىق قارىم- قاتىناستار 1992 -جىلى ورنىققان. 1994 -جىلى قازاقستان ۋكراينادا ءوز ەلشىلىگىن اشىپ، مولدوۆامەن قارىم- قاتىناسىن جۇزەگە اسىردى.

2014 -جىلى قازاقستان مولدوۆادا باس كونسۋلدىعىن اشتى. 2020 -جىلى قازاقستان پرەزيدەنتىنىڭ شەشىمىمەن مولدوۆاداعى باس كونسۋلدىق ەلشىلىك قىزمەتىن اتقارا باستادى. قازاقستاننىڭ كيشينيەۆتەگى ەلشىسى 2022 -جىلى تاعايىندالعان.

ساندۋ قازاقستاندا ەلشىلىك اشۋ تۋرالى جارلىققا بيىل 5-قىركۇيەكتە قول قويدى.

CentralAsia: قازاقستان اتوم ەنەرگياسىن ءوندىرۋدى ءۇش ەسەگە ارتتىرۋدى جوسپارلاپ وتىر

ق ر ەنەرگەتيكا ۆيتسە-ءمينيسترى سۇڭعات ەسىمحانوۆ بۇل ءوندىرىس ورنىقتى ءارى ەكولوگيالىق جاعىنان تازا بولعاندىقتان، بولاشاققا جاسالعان ماڭىزدى قادام دەپ مالىمدەدى. سول سەبەپتى قازاقستان 2050 -جىلعا قاراي اتوم ەنەرگەتيكاسىن پايدالانۋدى ءۇش ەسە ۇلعايتۋ تۋرالى دەكلاراتسياعا قوسىلدى. جاڭالىقتى اتالعان ۆەدومستۆوعا سىلتەمە جاساي وتىرىپ، CentralAsia جازدى.

قازاقستاننىڭ ەنەرگەتيكا ۆيتسە-ءمينيسترى سۇڭعات ەسىمحانوۆ باكۋدە وتكەن COP29 كليماتىنىڭ وزگەرۋى جونىندەگى ب ۇ ۇ كونفەرەنتسياسىندا اتوم ەنەرگياسىن ءوندىرۋ ماسەلەسىنە توقتالىپ، حالىقارالىق تالقىلاۋعا قاتىسقان.

- قازاقستاننىڭ 2050 -جىلعا قاراي اتوم ەنەرگياسىن ءۇش ەسە ۇلعايتۋ تۋرالى دەكلاراتسياعا قوسىلۋى - ءبىزدىڭ ورنىقتى جانە ەكولوگيالىق تازا بولاشاققا جاساعان ماڭىزدى قادامىمىز، - دەپ اتاپ ءوتتى سۇڭعات ەسىمحانوۆ.

قازاقستان وسى باستامانى قولداعان ءبىرقاتار ەلدەرگە، سونىڭ ىشىندە كانادا، فرانتسيا، ۇلىبريتانيا، جاپونياعا قوسىلدى. رەسپۋبليكا تۇراقتى دامۋعا جانە كليماتتىڭ وزگەرۋىنە قارسى كۇرەستە جاھاندىق كۇش- جىگەرگە ۇلەس قوسا وتىرىپ، اتوم ەنەرگياسىن بەيبىت ماقساتتا پايدالانۋ سالاسىنداعى حالىقارالىق ارىپتەستەرمەن ىنتىماقتاستىقتى نىعايتۋدى جوسپارلاۋدا.

Trend: ازيا دامۋ بانكى «جاسىل ءدالىز» جوباسىن قولداۋ ءۇشىن گرانت بولەدى

تاياۋدا بەلگىلى بولعانداي، قازاقستان، ازەربايجان مەن وزبەكستان «جاسىل» ەنەرگەتيكانى بىرلەسە دامىتۋ بويىنشا كەلىسىمگە كەلدى. ازيا دامۋ بانكى ەندى تەحنيكالىق- ەكونوميكالىق نەگىزدەمەنى دايىنداۋدى جانە بىرلەسكەن كاسىپورىندى ىسكە قوسۋعا كومەكتى قوسا العاندا، «جاسىل ءدالىز» جوباسى بويىنشا كونسۋلتاتسيالىق قىزمەتتەردى قولداۋ ءۇشىن 225 مىڭ دوللار مولشەرىندە گرانت ءبولۋ تۋرالى شەشىم قابىلداعان. بۇل تۋرالى ازەربايجاننىڭ ەنەرگەتيكا ءمينيسترى پارۆيز شاحبازوۆقا سىلتەمە جاساي وتىرىپ، Trend حابارلادى.

- ەكى كۇن بۇرىن جوعارى دەڭگەيدەگى COP29 اياسىندا ازەربايجان، قازاقستان جانە وزبەكستان اراسىندا «جاسىل» ەنەرگيانى دامىتۋ جانە تاسىمالداۋ سالاسىنداعى ستراتەگيالىق ارىپتەستىك تۋرالى ۇكىمەتارالىق كەلىسىمگە قول قويىلعان ەدى، - دەگەن ول.

مينيستر سونداي-اق ساۋد ارابياسىنىڭ وسى ءۇشجاقتى جوباداعى نەگىزگى ارىپتەس رەتىندەگى ءرولىن بەكىتەتىن قۇجاتقا قول قويىلعانىن دا اتاپ ءوتتى. بۇل وقيعا حالىقارالىق ەنەرگەتيكالىق ىنتىماقتاستىق پەن ەكولوگيالىق ينۆەستيتسيالارعا ەلەۋلى سەرپىن بەرەتىن ماڭىزدى ستراتەگيالىق قادام بولىپ سانالدى.

- جاڭارتىلاتىن ەنەرگيا كوزدەرى سالاسىنداعى ىنتىماقتاستىقتى كەڭەيتۋگە ۇلكەن ءمان بەرىلەدى. قازاقستان مەن وزبەكستاندى قوسا العاندا، ازەربايجان مەن ورتالىق ازيا ەلدەرى اراسىنداعى باۋىرلاستىق، دوستىق جانە ستراتەگيالىق بايلانىستاردى ايعاقتايتىن بۇل كەلىسىم «جاسىل» ەنەرگەتيكالىق ءدالىز قۇرۋعا، وڭىردەگى ەلەكتر ەنەرگياسىنىڭ ينتەگراتسيالانعان نارىقتارىن دامىتۋعا، باسقا وڭىرلەرگە جاڭارتىلاتىن ەنەرگيانى ەكسپورتتاۋعا بەرىك نەگىز قالايدى، - دەيدى پارۆيز شاحبازوۆ.

ونىڭ ايتۋىنشا، ۇلتتىق ەنەرگەتيكالىق كومپانيالاردىڭ اكتسيونەرلىك كەلىسىمگە قول قويۋى جانە بىرلەسكەن كاسىپورىن قۇرۋ جوبانى تابىستى ىسكە اسىرۋدىڭ نەگىزگى كەزەڭىنە اينالادى. بىرلەسكەن كاسىپورىن قۇرىلعاننان كەيىن ازەربايجان، قازاقستان جانە وزبەكستان ەنەرگيا جۇيەلەرىنىڭ ينتەگراتسياسىنىڭ تەحنيكالىق- ەكونوميكالىق نەگىزدەمەسى بويىنشا جۇمىستى باستاۋدى جوسپارلادى. جوباعا CESI كونسالتينگتىك كومپانياسى تارتىلدى.

- بۇل جوبا ازەربايجان، قازاقستان جانە وزبەكستانمەن عانا شەكتەلمەيدى. ورتالىق ازيانىڭ باسقا ەلدەرى، اسىرەسە قىرعىزستان مەن تاجىكستان بولاشاقتا وسى جوباعا قوسىلا الادى جانە ولار جاڭارتىلاتىن ەنەرگيانىڭ اۋىسپالى كوزدەرىن تەڭگەرىمدەۋ ءۇشىن وزدەرىنىڭ گيدرورەسۋرستارىنىڭ پايداسى تيەرى ءسوزسىز، - دەپ تۇيىندەدى ول.

Daryo: قازاقستان ازيا وليمپيادالىق كەڭەسىنە قوسىلدى

ازيا وليمپيادالىق كەڭەسى نيۋ-دەليدە وتكەن 44-شى باس اسسامبلەيادا ءوز كوميتەتتەرىنىڭ جاڭا مۇشەلەرىن تانىستىردى. حاباردى قازاقستاننىڭ ۇلتتىق وليمپيادا كوميتەتىنىڭ باسپا ءسوز قىزمەتىنە سىلتەمە جاساپ، Daryo تاراتتى.

قازاقستاننىڭ ۇ و ك پرەزيدەنتى گەنناديي گولوۆكين وسا سپورت كوميتەتىنە ەندى. سونداي-اق اتالعان ۇ و ك باس حاتشىسى ءالىمجان اقايەۆ وسا حالىقارالىق بايلانىستار كوميتەتىنىڭ مۇشەسى بولىپ تاعايىندالدى، ال جۇرتشىلىقپەن بايلانىس جانە ماركەتينگ دەپارتامەنتىنىڭ ديرەكتورى گۇلناز شوكەنوۆا و س ا مەديا-كوميتەتىنە كىرگەن. سپورت دەپارتامەنتىنىڭ باس مەنەدجەرى رومان تەمىرجانوۆ و س ا اقپارات جانە ستاتيستيكا كوميتەتىنىڭ جاڭا مۇشەسى بولىپ تاعايىندالدى.

ال ورتالىق ازيا وڭىرلىك دوپينگكە قارسى ۇيىمىنىڭ (RADOCA) ديرەكتورى ۆەنەرا ابدۋللا وسا دوپينگكە قارسى كوميسسياسىنىڭ مۇشەلىگىنە ۇسىنىلدى. اتالعان تۇلعالار 2028 -جىلعا دەيىن تاعايىندالعانى ايتىلعان.

اۆتور

ماديار تولەۋوۆ