الەمدىك ب ا ق-تاعى قازاقستان: حورۆاتيامەن ارىپتەستىك، ءونىم ەكسپورتى جانە تەمىر جول قۇرىلىسى

استانا. KAZINFORM - ادەتتەگىدەي جاھانداعى ءتۇرلى اقپارات قۇرالدارىندا قازاقستان جايلى اقپاراتتار از جازىلمادى. قازاقستاننىڭ حورۆاتيامەن ارىپتەستىگى، تاياۋ شىعىس ەلىمەن الىس- بەرىس، جاڭا تەمىر جول قۇرىلىسى بويىنشا كەلىسىم ءسوز بولدى. بۇعان قوسا، ەلىمىزدەگى ارداگەرلەردىڭ جايى دا جازىلىپتى. تولىعىراق Kazinform ءتىلشسىنىڭ شولۋىنان وقىڭىز.

Anadolu: قازاقستان مەن حورۆاتيا ارىپتەستىگى تەرەڭدەي بەرەدى

قازاقستان پرەزيدەنتى قاسىم-جومارت توقايەۆ حورۆاتيانىڭ سىرتقى ىستەر ءمينيسترى گوردان گرليچ-رادماندى اقوردادا قابىلدادى. كەزدەسۋ بارىسىندا قازاقستان مەن حورۆاتيا اراسىنداعى ءوزارا ءىس-قيمىلدىڭ قازىرگى جاعدايى مەن كەلەشەگى تالقىلاندى. جاڭالىقتى Anadolu جازدى.

پرەزيدەنت توقايەۆ ەكى ەل اراسىنداعى قاتىناستار كونسترۋكتيۆتى ديالوگ رۋحىندا ودان ءارى داميتىنىنا سەنىم ءبىلدىردى. مەملەكەت باسشىسى حورۆاتيامەن ساياسي، ساۋدا-ەكونوميكالىق جانە مادەني- گۋمانيتارلىق سالالارداعى ىنتىماقتاستىقتى كەڭەيتۋگە مۇددەلى ەكەنىن اتاپ ءوتتى.

گوردان گرليچ-رادمان قازاقستانعا كورسەتىلگەن قۇرمەت ءۇشىن العىسىن ءبىلدىرىپ، ەكىجاقتى قاتىناستاردى ودان ءارى نىعايتۋعا دايىن ەكەنىن جەتكىزدى. قازاقستان مەن حورۆاتيا اراسىنداعى ءوزارا ءىس- قيمىل ءوزارا سەنىم مەن سىندارلى ديالوگ رۋحىندا ءارى قاراي دامي بەرمەك.

مەملەكەت باسشىسى ءمينيستردىڭ بۇل ساپارى حورۆاتيانىڭ ەكىجاقتى قارىم-قاتىناستارعا جاڭا سەرپىن بەرۋگە نيەتتى ەكەنىن ايقىن كورسەتەتىنىن اتاپ ءوتتى.

پرەزيدەنت ەنەرگەتيكا، ينفراقۇرىلىم، فارماتسيەۆتيكا جانە تاماق ونەركاسىبى سياقتى سالالاردا حورۆات كومپانيالارىنىڭ قازاقستان نارىعىنا قىزىعۋشىلىعىنىڭ ارتىپ كەلە جاتقانىن ريزاشىلىقپەن اتاپ ءوتتى. ءقازىر قازاقستاندا Pliva مەن Podravka سياقتى تانىمال برەندتەردى قامتيتىن 30 دان استام حورۆاتيالىق قاتىسۋمەن جۇمىس ىستەيتىن كومپانيا تابىستى قىزمەت اتقارۋدا.

سونداي-اق قاسىم-جومارت توقايەۆ قازاق-حورۆات بيزنەس-فورۋمىنا حورۆاتيادان وكىلدىك دەلەگاتسيانىڭ قاتىسۋىن قۇپتاپ، قول جەتكىزىلگەن ۋاعدالاستىقتار ساۋدا-ەكونوميكالىق جانە ينۆەستيتسيالىق ىنتىماقتاستىقتىڭ كەڭەيۋىنە جول اشاتىنىن اتاپ ءوتتى. كەزدەسۋ بارىسىندا مادەنيەت پەن ءبىلىم بەرۋ سالالارىنداعى بايلانىستى نىعايتۋ پەرسپەكتيۆالارى دا تالقىلاندى.

Trend: يراننان قازاقستانعا جەتكىزىلگەن ءونىم كولەمى اتالدى

يران كۇنتىزبەسى بويىنشا، 2024 -جىلعى 20-ناۋرىزدان 20-جەلتوقسانعا دەيىن يراننان قازاقستانعا مۇنايعا جاتپايتىن ءونىم ەكسپورتى شامامەن 360 مىڭ توننانى قۇراپ، 203 ميلليون دوللارعا جەتتى. بۇنى ازەربايجاندىق Trend جاريالادى.

بۇل وتكەن جىلدىڭ سايكەس كەزەڭىمەن سالىستىرعاندا قۇندىق كورسەتكىش بويىنشا %38,5 عا، سالماق بويىنشا %2 عا ارتىق. ول كەزدە يران قازاقستانعا 353 مىڭ توننا ءونىم ەكسپورتتاپ، ودان 146 ميلليون دوللار تابىس تاپقان.

ەكسپورتتىڭ نەگىزگى بولىگىن اۋىل شارۋاشىلىعى جانە ازىق-تۇلىك ونىمدەرى، تەمەكى بۇيىمدارى، مۇناي- حيميا ونىمدەرى جانە باسقا دا تاۋارلار قۇرادى.

اتالعان كەزەڭ ىشىندە يران مەن قازاقستان اراسىنداعى جالپى تاۋار اينالىمى شامامەن 470 مىڭ توننا بولىپ، ونىڭ جالپى قۇنى 244 ميلليون دوللاردى قۇرادى.

ەكسپورت كولەمىنىڭ ءوسۋى ەكى ەل اراسىنداعى ەكونوميكالىق ىنتىماقتاستىقتىڭ كەڭەيىپ كەلە جاتقانىن جانە قازاقستاندىق نارىقتا يراندىق ونىمدەرگە قىزىعۋشىلىقتىڭ ارتقانىن كورسەتەدى.

Report: قازاقستان مەن اۋعانستان جاڭا تەمىر جول سالۋعا نيەتتى

قازاقستان مەن اۋعانستان تۋرگۋندي - گەرات - كانداگار - سپين-بولداك تەمىرجولىن سالۋعا قاتىسۋ نيەتىن بەكىتەتىن حاتتاماعا قول قويدى. بۇل تۋرالى قازاقستان ۇكىمەتىنىڭ باسپا ءسوز قىزمەتىنە سىلتەمە جاساپ، Report اگەنتتىگىنىڭ قازاقستاندىق بيۋروسى حابارلادى.

مالىمەتكە سايكەس، مەموراندۋمعا قازاقستان پرەمەر-ءمينيسترىنىڭ ورىنباسارى - ۇلتتىق ەكونوميكا ءمينيسترى سەرىك ءجۇمانعاريننىڭ اۋعانستانعا ساپارى اياسىندا قول قويىلعان.

«قول جەتكىزىلگەن ۋاعدالاستىقتاردىڭ جالعاسى رەتىندە كولىك جانە لوگيستيكا سالاسىنداعى ىنتىماقتاستىق تۋرالى كەلىسىمگە قول قويۋ جوسپارلانىپ وتىر. وسى كەلىسىم اياسىندا «تۋرگۋندي - گەرات» تەمىرجول ۋچاسكەسىنىڭ، قاجەتتى ينفراقۇرىلىمنىڭ جانە گەرات قالاسىنداعى كولىك- لوگيستيكالىق ورتالىقتىڭ قۇرىلىسى باستالاتىن بولادى»، - دەلىنگەن حابارلامادا.

اتالعان جوبا قازاقستان ءۇشىن وڭىرلىك ترانزيتتىك بايلانىستاردى كەڭەيتۋ، ورتالىق جانە وڭتۇستىك ازيا اراسىنداعى كولىك- لوگيستيكالىق قاتىناستاردى نىعايتۋ جانە ءۇندى مۇحيتىنداعى پورتتارعا قول جەتكىزۋ تۇرعىسىنان ەرەكشە ماڭىزعا يە.

جاڭا تەمىرجول جەلىسى اۋعانستان اۋماعى ارقىلى وتەتىن بولاشاق ترانسۇلتتىق ءدالىزدىڭ باستى بۋىنىنا اينالىپ، جۇكتەردى وڭتۇستىك باعىتتا تاسىمالداۋدىڭ ەڭ قىسقا جولىن قامتاماسىز ەتەدى.

قول قويىلعان حاتتاما قازاقستان، اۋعانستان جانە تۇرىكمەنستان تەمىرجولدارى اراسىندا بىرلەسكەن كاسىپورىن قۇرۋ مۇمكىندىگىن احقو (استانا حالىقارالىق قارجى ورتالىعى) يۋريسديكتسياسىندا قاراستىرۋدى كوزدەيدى.

سونىمەن قاتار، حابارلامادا تەمىرجول جەلىسىنىڭ بويىندا ءبىر مەزگىلدە تالشىقتى-وپتيكالىق كابەل جۇرگىزۋ دە جوسپارلانعانى ايتىلعان. سەرىك جۇمانعارين اۋعانستاننىڭ ازاماتتىق اۆياتسيا جانە كولىك ءمينيسترى حاميدۋللا احۋندزامەن دە كەزدەسۋ وتكىزدى. تاراپتار ەكى ەل اراسىندا تىكەلەي اۋە رەيستەرىن اشۋ، اۋعانستان نارىعىنا قازاقستاندىق اۆتوكولىكتەر مەن اۆتوبۋستاردى جەتكىزۋ، سونداي- اق اۋعانستاندىق ستۋدەنتتەردى قازاقستاننىڭ جوعارى وقۋ ورىندارىندا تەحنيكالىق ماماندىقتار بويىنشا وقىتۋ ماسەلەلەرىن تالقىلادى.

تاسس: قازاقستاندا 677 مىڭ سوعىس ارداگەرى تۋرالى مالىمەتتەر جاريالاندى

قازاقستاننىڭ مادەنيەت جانە اقپارات مينيسترلىگى جاڭارتىلعان «باتىرلارعا تاعزىم» ونلاين-پورتالىندا سوۆەت- گەرمان سوعىسىنىڭ 677 مىڭنان استام ارداگەرى تۋرالى اقپاراتتى جاريالادى. بۇل تۋرالى ۆەدومستۆونىڭ باسپا ءسوز قىزمەتىنە سىلتەمە جاساپ، رەسەيلىك تاسس حابارلادى.

«جوبا فاشيزمدى جەڭۋگە باعا جەتپەس ۇلەس قوسقان قازاقستاندىقتاردىڭ ەرلىگى مەن باتىرلىعى تۋرالى ەستەلىكتى ساقتاپ، ونى كەلەر ۇرپاققا جەتكىزۋگە باعىتتالعان. پورتالدا كولەمدى ءارى ۇنەمى تولىقتىرىلىپ وتىراتىن دەرەكتەر بازاسى ۇسىنىلعان. قازىرگى تاڭدا 677 مىڭنان استام ارداگەر تۋرالى مالىمەت قالىپتاستىرىلدى. ولاردىڭ ىشىندە 365 كەڭەس وداعىنىڭ باتىرى، ءتورت ەكى مارتە باتىر، جانە داڭق وردەنىنىڭ 19 يەگەرى بار»، - دەلىنگەن حابارلامادا.

پورتال ينتەرفەيسى پايدالانۋشىلارعا قاجەتتى اقپاراتتى تابۋعا عانا ەمەس، سونىمەن قاتار ءوز تۋىستارى - ارداگەرلەر تۋرالى ەستەلىكتەر مەن فوتوسۋرەتتەردى سايتقا جۇكتەۋگە، سونداي-اق وزەكتى جاڭالىقتارمەن تانىسۋعا مۇمكىندىك بەرەدى. قىزمەت بولاشاق ۇرپاق ءۇشىن تاريحي جادىنى ساقتاۋعا ارنالعان پلاتفورما رەتىندە قىزمەت ەتەدى جانە وتان قورعاۋشىلارعا قۇرمەت كورسەتكىسى كەلەتىن ازاماتتاردى بىرىكتىرۋگە ىقپال ەتەدى.

بۇعان دەيىن قازاقستاننىڭ مادەنيەت جانە اقپارات ءمينيسترى ايدا بالايەۆا «باتىرلارعا تاعزىم» پورتالىن «ەلەكتروندىق قۇجاتتاردىڭ ءبىرىڭعاي مۇراعاتى» اقپاراتتىق جۇيەسىمەن بىرىكتىرۋ جوسپارلانعانىن حابارلاعان ەدى. وسىلايشا، قازاقستاندىقتار سوعىس ارداگەرلەرى مەن ولاردىڭ ەرلىكتەرى تۋرالى مۇراعاتتىق قۇجاتتارعا قول جەتكىزە الاتىن بولادى.

قازاقستان استاناسىندا 7-مامىر كۇنى وتان قورعاۋشى كۇنى مەن ۇلى وتان سوعىسىنداعى جەڭىستىڭ 80 جىلدىعىنا ارنالعان اسكەري پاراد وتەدى. كورەرمەندەر جاياۋ پارادتىق ەسەپتەردىڭ مارشىن، مەحانيكالاندىرىلعان كولوننالاردىڭ شەرۋىن جانە اۆياتسيانىڭ اۋە ۇشۋلارىن تاماشالاي الادى. پارادقا 4 مىڭنان استام اسكەري قىزمەتكەر قاتىسادى. مەحانيكالاندىرىلعان كولوننا 300 دەن استام اسكەري جانە ارنايى تەحنيكالاردان تۇرادى. اۋە شەرۋىنە ءتۇرلى تيپتەگى 66 ۇشۋ اپپاراتى قاتىسادى.

سوعىس جىلدارىندا مايدانعا 1,3 ميلليوننان استام قازاقستاندىق موبيليزاتسيالانعان، ولاردىڭ جارتىسى ۇرىس دالاسىندا قازا تاپتى. 500 دەن استام قازاقستاندىق كەڭەس وداعىنىڭ باتىرى اتاعىنا يە بولدى. قازاقستاننىڭ ەڭبەك جانە حالىقتى الەۋمەتتىك قورعاۋ مينيسترلىگىنىڭ دەرەكتەرىنە سايكەس، قازىرگى تاڭدا ەلدە ۇلى وتان سوعىسىنىڭ 111 ارداگەرى جانە جەڭىسكە ۇلەس قوسقان 42,5 مىڭنان استام ازامات ءومىر سۇرۋدە.

اۆتور

ماديار تولەۋوۆ