الەمدەگى كوپتەگەن تۇيتكىلگە قاتىستى قازاقستان مەن بولگاريا ۇستانىمى ۇقساس - پرەزيدەنت

استانا. KAZINFORM - الەمدەگى كوپتەگەن تۇيتكىلگە قاتىستى قازاقستان مەن بولگاريا ۇستانىمى ۇقساس. بۇل تۋرالى اقوردادا بولگاريا پرەزيدەنتى رۋمەن راديەۆپەن كەلىسسوزدەردەن كەيىنگى بىرلەسكەن مالىمدەمە بارىسىندا مەملەكەت باسشىسى قاسىم-جومارت توقايەۆ ايتتى.

- پرەزيدەنت رۋمەن راديەۆ مىرزا ەكەۋىمىز ايماقتىق جانە جاھاندىق كۇن تارتىبىندەگى وزەكتى ماسەلەلەردى دە تالقىلادىق. الەمدەگى كوپتەگەن تۇيتكىلگە قاتىستى ەكى ەلدىڭ ۇستانىمى ۇقساس. ءبىز ءبىر-ءبىرىمىزدىڭ باستامالارىمىزدى ۇنەمى قولداپ كەلەمىز. كوپجاقتى قۇرىلىمدار اياسىنداعى ىقپالداستىعىمىز ويداعىداي دامىپ كەلەدى. مەن الماتىدا ب ۇ ۇ-نىڭ ورتالىق ازيا مەن اۋعانستاندى دامىتۋ ورتالىعىن قۇرۋ تۋرالى باستامانى قولداعانى ءۇشىن بولگار تاراپىنا، پرەزيدەنت مىرزاعا زور العىس ايتتىم، - دەدى قاسىم- جومارت توقايەۆ.

مەملەكەت باسشىسى الەمدەگى كۇرەلى گەوساياسي احۋال مەن ءتۇرلى قاقتىعىستار ەلدەرىمىزدى الاڭداتىپ وتىرعانىن باسا ايتتى.

- قوس تاراپ تا بارلىق تۇيتكىلدى بەيبىت جانە ساياسي ديپلوماتيالىق جولمەن شەشۋ قاجەت دەپ سانايدى. ءبىز كوپجاقتى ديپلوماتيانى ودان ارى دامىتۋعا ەرەكشە ءمان بەرەمىز. بولاشاقتا دا حالىقارالىق دەڭگەيدە كۇش-جىگەرىمىزدى بىرىكتىرىپ، ۇيلەسىمدى جۇمىس ىستەۋگە، بەيبىتشىلىك پەن تۇراقتىلىقتى نىعايتۋ ىسىنە بەلسەنە قاتىسۋعا كەلىستىك. بۇل ساپار قازاقستان مەن بولگاريانىڭ قارىم-قاتىناسىن تىڭ قارقىنمەن دامىتۋعا جول اشادى دەپ سەنەمىن. ءبىز ءبىر-بىرىمىزگە ءوزارا قولداۋ كورسەتىپ، ورتاق ماقساتتارعا بىرگە جەتەمىز. مەن بۇعان كامىل سەنەمىن، - دەدى پرەزيدەنت.

بۇعان دەيىن مەملەكەت باسشىسى قاسىم-جومارت توقايەۆ اقوردادا ەلىمىزگە رەسمي ساپارمەن كەلگەن بولگاريا پرەزيدەنتى رۋمەن راديەۆتى قارسى العانىن جازعان ەدىك.

بىرلەسكەن مالىمدەمە بارىسىندا پرەزيدەنت ترانسكاسپي حالىقارالىق كولىك دالىزىنە بولگاريانىڭ بۋرگاس جانە ۆارنا تەڭىز پورتتارىن قوسۋ ماسەلەسى قاراستىرىلاتىنىن ايتتى.