الەمدى كولىكپەن ارالاپ جۇرگەن قىتايلىق جۇپ قازاقستانعا ءتانتى بولدى
استانا. قازاقپارات - الەمدى كولىكپەن ارالاعان قىتايلىق جۇپ قازاقستانعا ءتانتى بولدى. Massaget.kz ءتىلشىسى دۇنيەجۇزىن كولىكپەن ارالاپ ارالاپ، بىرنەشە مىڭ شاقىرىمدى ارتقا تاستاعان ەرلى-زايىپتىمەن سۇحباتتاستى.
فان يۋحۋ مەن جۋ سيني 8 اي بويى كولىكپەن الەمدى شارلاپ، وڭتۇستىك- شىعىس ازيانىڭ 8 ەلىن ارالاعان. ولار قازاقسانعا كەلگەندە تۇرعىنداردىڭ قوناقجايلىعى مەن جاناشىرلىعىنا تاڭعالعان.
جۋ سينيدىڭ ايتۋىنشا، كۇيەۋىنىڭ وتباسىندا ءۇش ۇرپاق وكپەنىڭ قاتەرلى ىسىگىنەن قايتىس بولعان. سول ءۇشىن ەرلى-زايىپتى گازبەن جۇرەتىن كولىك ورنىنا، ەلەكتر كولىگىن تىزگىندەۋدى ماقسات قويعان. ولاردىڭ ايتۋىنشا، ءبىر جاعىنان، بۇل - قورشاعان ورتانى لاستاماۋ، ەكىنشى جاعىنان، اقشا ۇنەمدەۋ.
فان يۋحۋ جالعىز ءوزى الەم ارالاۋدى ارمانداپ كەلگەن. 42 جاسىندا 8 جىل جۇرگەن قىزىمەن ايىرىلىسىپ كەتكەن سوڭ «بۇل - ءبىر بەلگى» دەپ ويلاعان. ساياحاتىن باستاعان فان يۋحۋ العاشىندا ەشقانداي جوسپار قۇرماعان.
قىتايلىق جۇپ ساياحاتتى كىم قارجىلاندىراتىنىن، اقشانى قالاي ۇنەمدەيتىنىن ايتتى.
«اقشا تابۋ كولىكتى قۋاتتاۋدان قيىنىراق، ال ونى دۇرىس جۇمساۋ ودان دا اۋىر. ساياحاتشىلار ياۆا ارالى ارقىلى كاليمانتانداعى باندجارماسينگە باردىق. 25 مىڭ شاقىرىم جول ءجۇرىپ وتكەن ولار ەلەكتر قۋاتىنا نەبارى 200 يۋاننان (13 مىڭ تەڭگە) اسا اقشا جۇمسادىق. جول بويىندا كولىكتى تەگىن قۋاتتاۋعا مۇمكىندىك كوپ بولدى. ال گازبەن جۇرەتىن كولىككە شامامەن 10000 يۋاننان (675 مىڭ تەڭگە) اسا اقشا جۇمسار ەدىك. تابىسىمىزدىڭ نەگىزگى كوزى - جارناما، كىتاپ ساتۋ»، - دەيدى ولار.
ساياحاتشىلاردىڭ ايتۋىنشا، ولار كولىك جۇرگىزۋدەن شارشامايدى. الايدا ۇزاق جول ميعا دا، دەنەگە دە اسەر ەتەدى.
«پسيحيكالىق تۇرعىدان قاجىپ، فيزيكالىق تۇرعىدان شارشاپ قالامىز. ءبىراق ءبىزدىڭ «ارمانىمىز» - بىزگە موتيۆاتسيا! كۇيەۋىم فان يۋحۋ كولىك ايداپ، جولدا جۇرگەنىنە 10 جىل بولدى، تاجىريبەسى كوپ. بىردە مالايزيادا جول اپاتىنا تۇستىك، ءبىراق سوندا دا ارمانىمىزدان باس تارتپادىق»، - دەيدى جۋ سين.
قازاقستان قىتايلىق جۇپتى قالاي ءتانتى ەتتى؟ ولار بۇل سۇراققا جاۋاپ بەردى.
«قازاقستاندا كوزىمىزدى اشتى. تۇرعىنداردىڭ ادامگەرشىلىگى مول، مەيىرىمدى، قول ۇشىن سوزۋعا دايىن، ولارمەن تىلدەسۋ وڭاي. ءبىر تىلدە سويلەي الماساق تا، ولار شىدامدىلىق تانىتىپ، اۋدارماشى ارقىلى ءبىر-بىرىمىزبەن سويلەسۋگە مۇمكىندىك بەردى. قازاقستان وتە تازا ەل ەكەن، جولى دا ساياحاتتاۋعا ىڭعايلى. ءبىر قىزىعى، جانارماي قۇيۋ بەكەتتەرىندە كۇزەتشىلەرى بار، ولار تاۋلىك بويى اشىق. بۇل جولى مەن قازاقستاننىڭ استاناسى ارقىلى وتتىك. ەكى كۇن قاتارىنان ءدامدى اس ىشتىك. ساياحاتتا جۇرگەندە مەندە كوبىنە توقاش پەن ءسۇت قانا ىشەتىنبىز. استانالىقتار اعىلشىن تىلىندە جاقسى سويلەيدى ەكەن. قازاق حالقىنىڭ قوناقجايلىلىعى ءبىزدى قاتتى قۋانتتى»، - دەيدى فان يۋحۋ.
ساياحاتشى جۇپ نەگىزگى ماقساتىن ايتىپ بەردى. ولار جاڭا الەمدىك رەكورد ورناتقىسى كەلەتىنىن جاسىرمادى.
«ءبىزدىڭ تۇپكى ماقساتىمىز - الەمدىك رەكوردتى جاڭارتۋ. ءبىز 800 كۇندە التى كونتينەنتتىڭ 100 ەلىن ەلەكتر كولىگىمەن شارلاپ ءوتۋدى جوسپارلاپ وتىرمىز. ءبىزدىڭ ساياحات جوسپارىمىز - ءبىز ءالى بارماعان ەلدەرگە بارۋ، قازىر 82 ەلگە بارىپ كەلدىك. قازىر وڭتۇستىك- شىعىس ازيانى ارالاپ بىتتىك، ال قازاقستان - ورتالىق ازياعا ساياحات جاساعان العاشقى ەل. كەلەسى كەزەكتە رەسەيگە، موڭعولياعا، ەۋروپا ەلدەرىنە، افريكا ەلدەرىنە، امەريكا مەن وكەانياعا بارۋدى جوسپارلاپ وتىرمىز»، - دەيدى ولار.
قىتايلىق جۇپ ساپار بارىسىنداعى قىزىق ساتتەردى ءبولىستى.
«قازاقستاندا بىرنەشە رەت جول پوليتسياسىنا كەزىكتىك. ەرەجەنى بۇزدىق پا دەپ الاڭداعان ەدىك. الايدا ولار جولدا اباي بولۋدى ەسكە سالدى. سونداي-اق، جەرگىلىكتى تۇرعىندار تاماق پەن سۋسىن بەرىپ، بىزگە ءسات ساپار تىلەگەن تۇرعىندار دا بولدى. بۇل بىزگە قاتتى اسەر ەتتى»، - دەيدى جۇپ.
