الەمدە قۇس تۇماۋى تارالىپ جاتىر

استانا. KAZINFORM - ا ق ش- تىڭ كاليفورنيا شتاتىندا العاش رەت جاڭا تۋعان نارەستەدەن قۇس تۇماۋى انىقتالدى. وسىعان دەيىن، ۆيرۋستىڭ تارالۋى تەك ەرەسەك ادامداردا كەزدەسكەن بولاتىن. دۇنيەجۇزىلىك دەنساۋلىق ساقتاۋ ۇيىمدارى ماماندارى اۋرۋعا بەي- جاي قاراماۋعا، مال جانە قۇس شارۋاشىلىعىمەن اينالىساتىن فەرمەرلەرگە ساقتانۋعا شاقىرادى. بۇل تۋرالى 24.kz سايتى جازدى.

جالپى ۆيرۋستىڭ باسقا ەلدەرگە تارالۋ قاۋپى قانداي؟

ا ق ش- تىڭ كاليفورنيا شتاتىندا العاش رەت H5N1 ءتيپتى قۇس تۇماۋى جاڭا تۋعان سابيدەن انىقتالدى. ينفەكتسيا اۋرۋلاردى باقىلاۋ جانە الدىن الۋ جونىندەگى فەدەرالدى ورتالىقتا راستالدى. ماماندار بالانىڭ ينفەكتسيانى قالاي جۇقتىرعانىن انىقتاۋ ءۇشىن، وتباسى مۇشەلەرىنەن سىناقتار الدى. ناتيجە تەرىس بولدى. دەگەنمەن، وزگە دە رەسپيراتورلىق ۆيرۋستار بولۋى مۇمكىن دەيدى دارىگەرلەر.

جالپى جىل باسىنان بەرى، قۇس تۇماۋىن 55 ادام جۇقتىرعان. ونىڭ 29 ى كاليفورنيا شتاتىنان انىقتالدى. وسىعان قاراماستان، حالىق ءۇشىن ينفەكتسيانىڭ تارالۋ قاۋپى تومەن بولىپ قالا بەرەدى، دەيدى شتات بيلىگى.

نەگىزىنەن ۆيرۋس قۇستارمەن جانە مالمەن بايلانىستا بولاتىن فەرمەرلەر ءۇشىن وتە قاۋىپتى. بىرەر اپتا بۇرىن قۇس تۇماۋىن كانادالىق جەتكىنشەك جۇقتىردى. ول بريتاندىق كولۋمبيا پروۆينتسياسىنىڭ تۇرعىنى. H5N1 ۆيرۋسىن جۇقتىرۋ كوزى ءالى انىقتالعان جوق، ءبىراق بالا ۆيرۋستى جۇقتىرماس بۇرىن، يت- مىسىقپەن ويناعان. ارتىنشا، بىردەن قىزۋى كوتەرىلىپ ءوزىن جايسىز سەزىنگەن. كوزى قىشىپ، جوتەلى ۇلعايعان سوڭ اۋرۋحاناعا جاتقىزىلدى. ازىرگە جاعدايى قالىپتى، دارىگەرلەردىڭ باقىلاۋىندا.

جالپى بۇل ايماقتا جابايى قۇستار اراسىندا قۇس تۇماۋىنىڭ 26 جاعدايى تىركەلگەن. 1960 -جىلدارى اشىلعان قۇس تۇماۋى ۆيرۋسى ۇزاق ۋاقىت بويى ادامدارعا قاۋىپ توندىرمەدى. الايدا جاعداي 20-عاسىردىڭ اياعىندا تۇبەگەيلى وزگەردى. 1997 -جىلى قىتايدىڭ گونكونگ قالاسىندا ۆيۋرستان التى ادام كوز جۇمدى. سودان بەرى قۇس تۇماۋى ازيادان ەۋروپاعا، ا ق ش- قا جانە افريكاعا ەت- ءسۇت ونىمدەرىن ساتۋ ارقىلى تارادى.

دۇنيەجۇزىلىك دەنساۋلىق ساقتاۋ ۇيىمىنىڭ دەرەگىنە سۇيەنسەك، كەيىنگى 2 ونجىلدىقتا 23 ەلدە قۇس تۇماۋىن 800 دەن استام ادام جۇقتىرىپ، 463 ادام قايتىس بولعان.