الماتىنىڭ قۋىرشاق تەاترى كانادادا گران-پري جەڭىپ الدى
الماتى. KAZINFORM - الماتى مەملەكەتتىك قۋىرشاق تەاترى وتتاۆا قالاسىندا وتكەن 1- حالىقارالىق «وتتاۆا» قۋىرشاق تەاترلار فەستيۆالىندە «رومەو مەن دجۋلەتتا» قويىلىمى ءۇشىن گران-پري جۇلدەسىنە يە بولدى.
كانادا مەملەكەتىنىڭ استاناسى وتتاۆا قالاسىندا تۇڭعىش رەت 1-حالىقارالىق «وتتاۆا» قۋىرشاق تەاترلار فەستيۆالى وتكىزىلدى. حالىقارالىق شىعارماشىلىق پەن ىنتىماقتاستىقتى كوزدەگەن مادەني ءىس-شاراعا ەلىمىزدىڭ كوك تۋىن ۇستاپ شىققان العاشقى قازاقستاندىق ونەر ءورداسى الماتى مەملەكەتتىك قۋىرشاق تەاترى بولدى. وتاندىق تەاتردىڭ شىعارماشىلىق ۇجىمى فەستيۆال اياسىندا كانادالىق كورەرمەندەردىڭ نازارىنا ءوز رەپەرتۋارىنداعى ەرەكشە قويىلىمداردىڭ ءبىرى، اعىلشىن دراماتۋرگى ۋيليام شەكسپيردىڭ ايگىلى تراگەدياسى جەلىسىمەن ساحنالانعان، نازىك تە تازا ماحابباتتىڭ قۇدىرەتىن سەزدىرەتىن «رومەو مەن دجۋلەتتا» سپەكتاكلىن ۇسىندى.
ايتا كەتەيىك، قۋىرشاق تەاترىنىڭ رەپەرتۋارىنداعى «رومەو مەن دجۋلەتتا» سپەكتاكلى 2019-جىلى بەلگىلى رەجيسسەر دينا جۇمابايەۆانىڭ جەتەكشىلىگىمەن جارىققا شىققان. 2022-جىلى اتالمىش سپەكتاكل بولگاريا رەسپۋبليكاسى ۆارنا قالاسىندا وتكەن حالىقارالىق «التىن دەلفين» قۋىرشاق تەاترلار فەستيۆالىندە ۇزدىك دەپ تانىلىپ «گران-پري» جۇلدەسىنە، «ەڭ ۇزدىك ەر ادام» جۇلدەسىنە، «ەڭ ۇزدىك دەبيۋت» جۇلدەسىنە لايىقتى بولعان. ال وعان دەيىن 2021-جىلى قاراعاندى قالاسىندا وتكىزىلگەن اشىربەك سىعاي اتىنداعى «سىن-شىن بولسىن» رەسپۋبليكالىق تەاترلار فەستيۆالىندە 1-ورىندى جەڭىپ العان.
قازاقستان رەسپۋبليكاسىنىڭ كاناداداعى توتەنشە جانە وكىلەتتى ەلشىسى داۋلەتبەك قۇسايىنوۆ فەستيۆال اياسىندا قۋىرشاق تەاترىنا قولداۋ ءبىلدىردى.
«ءبىزدىڭ جاستار وتە جوعارى دەڭگەيدەگى جۇمىستى كورسەتتى جانە وتە قىزىق ماحاببات حيكاياسىن سەزىندىردى. ءوز دارىندارىن، جالپى قازاق جاستارىنا ءتان تالانتتى كانادا حالقىنا تانىستىردى»، - دەدى داۋلەتبەك قۇسايىنوۆ.
ەسكە سالايىق، بۇعان دەيىن الماتىداعى قۋىرشاق تەاترىنىڭ ماۋسىمى ەكى قويىلىممەن جابىلعانىن جازعان ەدىك.
