الماتىنىڭ ەكونوميكاسى بيىل تۇراقتى ءوسۋ ءۇردىسىن كورسەتىپ وتىر
استانا. قازاقپارات - 2025-جىلدىڭ العاشقى ءتورت ايىندا قىسقا مەرزىمدى ەكونوميكالىق ينديكاتور 9,1 پايىزعا ءوستى، بۇل تۇراقتى ەكونوميكالىق بەلسەندىلىك پەن قالا ەكونوميكاسىنىڭ ءتۇرلى سالالارىنداعى وڭ ۇردىستەردى كورسەتەدى. بۇل تۋرالى ۇكىمەتتىڭ باسپا ءسوز قىزمەتى حابارلادى.
ءوسۋدىڭ نەگىزگى درايۆەرلەرى ءۇش نەگىزگى سەكتور: كولىك، قۇرىلىس جانە وڭدەۋ ونەركاسىبى بولدى. اتاپ ايتقاندا، كولىك سالاسى ەڭ ماڭىزدى ءوسىمدى كورسەتتى - 23,9 پايىز. ياعني، قازاقستاننىڭ ەڭ ءىرى قالاسىندا تاسىمالداۋ مەن لوگيستيكالىق قىزمەتتەرگە سۇرانىس جوعارى. تيىسىنشە كولىك ينفراقۇرىلىمى دا دامىپ جاتىر. قۇرىلىس سەكتورى دا 21,3 پايىز ءوسىم كورسەتتى. وڭدەۋ ونەركاسىبى 17,6 پايىزعا ارتتى.
وتكەن جىلى الماتىنىڭ جالپى وڭىرلىك ءونىمىنىڭ ءوسۋى 5,6 پايىزدى قۇرادى، بۇل جان باسىنا شاققانداعى ج و ءو- ءنى $27,5 مىڭ دەڭگەيىندە قامتاماسىز ەتۋگە مۇمكىندىك بەردى. ول قازاقستان وڭىرلەرى اراسىنداعى ەڭ ۇزدىك كورسەتكىشتەردىڭ ءبىرى. قالانىڭ ساپالى جانە تۇراقتى الەۋمەتتىك-ەكونوميكالىق دامۋىن قامتاماسىز ەتۋ ءۇشىن ەكونوميكانى ءارتاراپتاندىرۋعا جانە ينۆەستيتسيالاردى بەلسەندى تارتۋعا ەرەكشە نازار اۋدارىلادى.
2025-جىلدىڭ قاڭتار-ءساۋىر ايلارىنداعى كورسەتكىشتەر مەن اعىمداعى ۇردىستەردى تالداۋ تۋرالى قوسىمشا اقپاراتتى ءبىزدىڭ تولىق شولۋ ماتەريالىمىزدان تابۋعا بولادى.
ينۆەستيتسيالىق قىزمەت جانە ونەركاسىپتى دامىتۋ
الماتى قازاقستاننىڭ ەڭ ينۆەستيتسيالىق تارتىمدى وڭىرلەرىنىڭ ءبىرى بولىپ قالا بەرەدى. 2025-جىلدىڭ قاڭتار-ءساۋىر ايلارىندا نەگىزگى كاپيتالعا 541,3 ميلليارد تەڭگە سالىندى، بۇل وتكەن جىلدىڭ سايكەس كەزەڭىنەن 35,6 پايىزعا ارتىق. ينۆەستيتسيا كولەمى بويىنشا قالا ەلىمىزدىڭ بارلىق ءوڭىرى اراسىندا ءبىرىنشى ورىنعا يە بولدى.
كەلەسى سالالارعا ينۆەستيتسيالار بارىنشا سەرپىندى ءوسىپ وتىر:
ءبىلىم بەرۋ - 7,2 ەسە ءوسۋ،
قارجىلىق جانە ساقتاندىرۋ قىزمەتى - 2 ەسە،
سۋمەن جابدىقتاۋ جانە سۋ بۇرۋ - 1,9 ەسە،
تۋريزم - 1,5 ەسە،
جىلجىمايتىن مۇلىك وپەراتسيالارى - 22,1 پايىز،
ەلەكترمەن جانە جىلۋمەن جابدىقتاۋ - 19,4 پايىز،
كولىك جانە قويمالاۋ - 14,7 پايىز.
الماتىدا بۇگىندە جالپى سوماسى 1,7 تريلليون تەڭگەگە 24,4 مىڭ جۇمىس ورنىن قۇرۋمەن 151 جوبا ىسكە اسىرىلۋدا. ونىڭ ىشىندە 2025-جىلى 10,3 مىڭ جۇمىس ورنىن قۇرۋمەن 496 ميلليارد تەڭگە سوماسىنا 40 جوبانى ىسكە قوسۋ جوسپارلانۋدا.
ءىرى جوبالاردىڭ قاتارىندا:
«Changan» ،«Chery» جانە «Haval» مۋلتيبرەندتىك اۆتوزاۋىتتارى (182 ميلليارد تەڭگە)
«Almaty Museum of Arts» مۋزەيى (44 ميلليارد تەڭگە)
«Wildberries» لوگيستيكالىق ورتالىعى (43,2 ميلليارد تەڭگە)
«Kaspi Cloud» دەرەكتەردى وڭدەۋ ورتالىعى (7 ميلليارد تەڭگە)
«Medeu Park Hotel» قوناق ءۇي كەشەنى (17 ميلليارد تەڭگە)
تارتىلعان ينۆەستيتسيالاردىڭ جالپى كولەمى 2025 -جىلى 2,2 تريلليون تەڭگەدەن اسادى دەپ بولجانۋدا.
تۋريزم جانە ونىڭ قالا ەكونوميكاسىنداعى ءرولى
تۋريستىك سالانى دامىتۋ - الماتىنىڭ الەۋمەتتىك- ەكونوميكالىق دامۋىنىڭ ماڭىزدى فاكتورى. تۋريزم قالا ەكونوميكاسىنىڭ 3,9 پايىزىن قۇرايدى. 2024-جىلى قالاعا 2,3 ميلليوننان استام تۋريست كەلدى، بۇل وتكەن جىلمەن سالىستىرعاندا 14,8 پايىزعا كوپ.
قازاقستانعا كەلگەن ءاربىر ەكىنشى شەتەلدىك تۋريست الماتىعا بارادى. وتكەن جىلى ولاردىڭ سانى 27 پايىزعا ءوسىپ، 686,3 مىڭ ادامعا جەتتى، بۇل قازاقستان بويىنشا بارلىق تۋريستەردىڭ 53 پايىزىن قۇرايدى.
كورسەتىلگەن تۋريستىك قىزمەتتەر كولەمى 30 پايىزعا ارتىپ، 96,3 ميلليارد تەڭگەگە جەتتى (2023-جىلى 74 ميلليارد تەڭگە). ناتيجەسىندە تۋريستىك قىزمەتتەن قالا بيۋجەتىنىڭ كىرىسى 2 ەسەگە جۋىق - 90,7 ميلليارد تەڭگەگە دەيىن ءوستى (2023-جىلى 47,2 ميلليارد تەڭگە).
تۋريزم سالاسىندا قالادا جۇمىسپەن قامتىلعانداردىڭ جالپى سانىنىڭ 7,7 پايىزى جۇمىسپەن قامتىلعان - 83,5 مىڭ ادام، بۇل 2023-جىلمەن سالىستىرعاندا 3 پايىزعا ارتىق.
تۋريستىك اعىننىڭ ءوسۋى نەگىزگى كاپيتالعا ينۆەستيتسيالاردىڭ ۇلعايۋىمەن قاتار جۇرەدى. 2025-جىلدىڭ قاڭتار-ءساۋىر ايلارىندا 40,2 ميلليارد تەڭگە ينۆەستيتسيا تارتىلدى، بۇل وتكەن جىلدىڭ سايكەس كەزەڭىمەن سالىستىرعاندا 1,5 ەسە كوپ. 2025-جىلى الماتىعا 2,5 ميلليون تۋريستەر كەلەدى دەپ بولجانىپ وتىر.
ايتا كەتەلىك ولجاس بەكتەنوۆ الماتى تاۋ كلاستەرىن ودان ءارى دامىتۋ تاسىلدەرىمەن تانىسقان ەدى.
