الماتىداعى اۆتوبۋس اپاتى: پروكۋرور ايىپتالۋشىنى 2,5 جىلعا باس بوستاندىعىنان ايىرۋدى سۇرادى

الماتى. KAZINFORM - الماتىدا «5:32» سەريالىنىڭ پروديۋسەرى سەبەپكەر بولعان جول اپاتىنا قاتىستى سوت وتىرىسى جالعاسىپ جاتىر.

ءىس المالى اۋداندىق سوتىندا ق ر قىلمىستىق كودەكسىنىڭ 345-بابىنىڭ 3-بولىگى بويىنشا قارالىپ جاتىر. 28 جاستاعى ايەلگە كولىك قۇرالىن باسقارۋ كەزىندە جولدا ءجۇرۋ قاعيدالارىن بۇزۋ، ونىڭ ىشىندە ابايسىزدا ادام ولىمىنە اكەپ سوعۋ بابى بويىنشا ايىپ تاعىلىپ وتىر.

پروكۋرور سوتتان انەل ساراتايەۆانى كىنالى دەپ تانىپ، 2 جىل 6 ايعا باس بوستاندىعىنان ايىرۋدى سۇرادى.

«سوتتان انەل سارتايەۆا جازاسىن ەڭ تومەنگى تۇزەۋ مەكەمەسىندە وتەۋدى، سونداي-اق 5 جىل مەرزىمگە كولىك قۇرالىن باسقارۋ قۇقىعىنان ايىرۋ تۋرالى جازا تاعايىنداۋدى جانە بۇلتارتپاۋ شاراسىن قاماۋعا الۋ تۇرىنە اۋىستىرىلۋىن سۇرايمىن»، - دەدى پروكۋرور.

ايىپتاۋشىنىڭ سوزىنشە، سارتايەۆانىڭ جازاسىن جەڭىلدەتەتىن ءمان-جايلارعا ونىڭ شىن جۇرەكتەن وكىنۋى، كىناسىن مويىنداۋى، جاس بالاسىنىڭ بولۋى، سونداي-اق قىلمىستىڭ ءبىرىنشى رەت جاسالۋى جانە اۋىرلىعى تومەن بولۋى جاتادى.

وسىعان دەيىن، جول اپاتىنان قازا بولعان مارقۇمنىڭ وتباسى جۇرگىزۋشىنى كەشىرگەنى تۋرالى جازعان ەدىك.

ەسكە سالايىق، 26-ماۋسىم كۇنى قوعامدىق كولىك پەن جەڭىل ماشينا سوقتىعىسقان ەدى. سالدارىنان 16 ادام جاراقات الىپ، ءبىر ادام قازا تاپتى.

كەيىن قوعامدىق كولىك كامەراسى تۇسىرگەن بەينەجازبا جەلىدە تارادى.

اۆتوبۋستىڭ اپاتقا ۇشىراۋىنا «5:32» سەريالىنىڭ پروديۋسەرى سەبەپكەر بولعان.

كەيىن كۇدىكتى دەپ تانىلعان جەڭىل كولىك جۇرگىزۋشىسى انەل سارتايەۆا تەرگەۋ ۋاقىتىندا ءۇي قاماعىندا بولاتىنى تۋرالى جازعان ەدىك.