الماتىداعى اسكەري ينستيتۋتىنىڭ العاشقى تۇلەكتەرى وقۋدى ءتامامدادى

الماتى. KAZINFORM - راديوەلەكترونيكا جانە بايلانىس اسكەري-ينجەنەرلىك ينستيتۋتىنىڭ وقۋ ورتالىعىندا اسكەري ماماندىق بەرۋ تۋرالى كۋالىك العان كىشى مامانداردىڭ سالتاناتتى تۇردە وقۋدى اياقتاۋ ءراسىمى ءوتتى.

قارۋلى كۇشتەر قاتارىنا شاقىرىلعان مەرزىمدى قىزمەتتىڭ اسكەري قىزمەتشىلەرى 5 ماماندىق بويىنشا ءبىلىم الدى. ءۇش اي بويى ساربازدارعا جاۋىنگەرلىك، ارنايى جانە تەحنيكالىق دايىندىق ساباقتارى وتكىزىلدى.

- ءبىلىم ورداسىنىڭ وقۋ ورتالىعىندا ودان ءارى قىزمەت وتكەرۋ ءۇشىن قاجەتتى ءبىلىم الدىم. كومانديرلەرگە باستاپقى دايىندىقتى ۇيرەتكەندەرى جانە كورسەتكەن قامقورلىقتارى ءۇشىن العىس ايتامىن. الدا ءومىرىمدى ارميامەن بايلانىستىرۋدى جوسپارلاپ وتىرمىن، - دەدى كۋرس تۇلەگى جاپپار ومىرسەرىك.

وقۋ اياقتالعاننان كەيىن راديوتەحنيكالىق اسكەرلەر ماماندارى، «يگلا» جىلجىمالى زەنيتتىك زىمىران كەشەنىنىڭ زەنيت-اتقىشتارى، ز ز ك-75، ز ز ك-300 قولمەن سۇيەمەلدەۋ وپەراتورلارى جانە ديزەليست-ەلەكتريكتەر اۋە قورعانىسى كۇشتەرى ءا ش ق ق اسكەرلەرىنىڭ قۇرامالارى مەن بولىمدەرىنە جىبەرىلەتىن بولادى.

بۇل لەكپەن كۇزدە اسكەرگە شاقىرىلعان 130 سارباز اسكەري ەسەپتىك ماماندىق بويىنشا وقىعانىن ايتا كەتەلىك.