الماتىداعى اۋعان تاۋارلارى كورمەسىنە قارۋ-جاراق قويىلعانى راس پا

استانا. KAZINFORM - بىرەر كۇن بۇرىن الماتىدا اۋعان تاۋارلارىنىڭ كورمەسى ءوتتى. جەلىدە سول كورمەگە قارۋعا ۇقساس زاتتار قويىلعانى جايلى اقپارات تارادى.

ساۋدا جانە ينتەگراتسيا مينيسترلىگىنىڭ رەسمي مالىمەتىنشە كورمەگە قولدان توقىلعان كىلەمدەر، جەمىس-جيدەك، كوكونىس، جاڭعاقتار، شافران ءشايى، انتيكۆاريات، قۇرىلىس ماتەريالدارى، اسىل تاستار، كونديتەرلىك ونىمدەر مەن باسقا دا كوپتەگەن ءداستۇرلى اۋعان تاۋارلارى قويىلدى.

بۇگىن ۇكىمەت وتىرىسىنان كەيىن وتكەن باسپا ءسوز ءماسليحاتىندا ب ا ق وكىلدەرى ق ر پرەمەر-ءمينيسترىنىڭ ورىنباسارى سەرىك جۇمانعاريننەن كورمەگە قويىلعان زاتتار، ونىڭ ىشىندە قارۋ-جاراققا ۇقساس بۇيىمداردىڭ بار-جوعىن ناقتىلادى.

«اۋعان حالقى تۋمىسىنان قولونەرشى. بۇل الەمنىڭ تاريحي قيىلىسى. ءسىز ولاردىڭ مەتالدان جاسالعان بۇيىمدارىن كوردىڭىز بە؟ مەن كورمەدەن ارماتۋرادان جاسالعان اۋىر بالعانى كوردىم، ياعني مەتالدان كەز كەلگەن زاتتى جاساي الادى. ولار تاڭعاجايىپ بۇيىمدار جاسايدى، مۇنىڭ ءبارى جاڭاشىلدىق. كورمەگە قويىلعان دۋلىعا باسقا دا كادەسىيلاردى ادامدار ساتىپ الۋى مۇمكىن»، - دەپ جاۋاپ بەردى سەرىك جۇمانعارين بريفينگ بارىسىندا.

وسىلايشا ۆيتسە-پرەمەر اۋعان تاۋارلارى كورمەسىنە ەشقانداي قارۋ-جاراق قويىلماعانىن ايتىپ وتىر.

بۇعان دەيىن قازاقستاندا اۋعان تاۋارلارىن ساتاتىن ساۋدا ءۇيى اشىلاتىنى تۋرالى حابارلاعان ەدىك.

ايتا كەتسەك، قازاقستان مەن اۋعانستان اراسىنداعى ساۋدا اينالىمى 330,7 ميلليون دوللارعا جەتتى.