الماتىدا زاڭسىز سالىنعان ءدامحانا مەن ساۋدا الاڭدارى بۇزىلدى
الماتى. KAZINFORM - الماتىدا سوت شەشىمىمەن ۆيليامس كوشەسى، 73 مەكەنجايىندا ورنالاسقان ءىرى قۇرىلىس بۇزىلدى.
قالا قۇرىلىسىن باقىلاۋ باسقارماسى ءمالىم ەتكەندەي، بۇعان دەيىن مەنشىك يەسىنە جوبالاۋ-سمەتالىق قۇجاتتامانىڭ جانە ساراپتاما قورىتىندىسىنىڭ، اۆتورلىق جانە تەحنيكالىق قاداعالاۋلاردىڭ بولماۋىنا بايلانىستى اكىمشىلىك شارا قابىلداعان.
تەكسەرۋ بارىسىندا مەنشىك يەسى ەكونوميكالىق ادىسپەن ءدامحانا مەن ساۋدا الاڭدارىن سالعانى انىقتالدى.
«مەنشىك يەسى جىبەرىلگەن بۇزۋشىلىقتاردى جويۋعا بەرىلگەن نۇسقامانى ورىندامادى جانە باسقارما الماتى قالاسىنىڭ مامانداندىرىلعان اۋدانارالىق ەكونوميكالىق سوتىنا بۇزۋعا تالاپ ارىز ءتۇسىردى. وسى جىلدىڭ 7-ناۋرىزىندا سوتتىڭ شەشىمىمەن باسقارمانىڭ تالاپ- ارىزى قاناعاتتاندىرىلدى. مەنشىك يەسى نىساندى سوت ورىنداۋشىلارىنىڭ قاتىسۋىمەن بۇزدى»، - دەپ حابارلادى باسقارمادان.
ەستەرىڭىزگە سالا كەتەيىك، الماتى اكىمى ەربولات دوسايەۆتىڭ زاڭسىز قۇرىلىسقا باقىلاۋدى كۇشەيتۋ جونىندەگى تاپسىرماسى اياسىندا وتكەن جىلدىڭ باسىنان بەرى 45 زاڭسىز نىسان، ونىڭ ىشىندە «مەچتا»، KHAN، «الما گاردەن» تۇرعىن ءۇي كەشەندەرى بۇزىلدى.
