الماتىدا تاريحي تۇلعالاردىڭ زيراتتارى سيفرلىق كارتاعا ەنگىزىلدى
الماتى. KAZINFORM - مەگاپوليستە «الماتىنىڭ تاريحي جادى» جوباسى كوپشىلىككە جول تارتتى.
الماتى اكىمدىگىنىڭ مالىمەتىنشە، بۇل باستاما اياسىندا ادامدار تانىمال تۇلعالار مەن مەملەكەت جانە قوعام قايراتكەرلەرى ءومىر ءسۇرىپ، ەڭبەك ەتكەن ورىنداردى ارالاپ، ولاردىڭ ەسكەرتكىشتەرى مەن مەموريالدارىن، جەرلەنگەن جەرلەرىن، تاريحي كوشەلەر مەن نىسانداردى وڭاي تابا الادى. 2GIS سەرۆيسىنە بارلىق نىسان تۋرالى اقپارات ءۇش تىلدە - قازاق، ورىس جانە اعىلشىن تىلدەرىندە ەنگىزىلگەن.
جوبا اياسىندا الماتىنىڭ ورتالىق زيراتى، كەڭساي-1 جانە كەڭساي-2 زيراتتارى العاش رەت ساندىق فورماتتا ۇسىنىلىپ وتىر. بۇل جەرلەردە باۋىرجان مومىش ۇلى، تالعات بيگەلدينوۆ، كۇلاش بايسەيىتوۆا، احمەت جۇبانوۆ، مۇحتار اۋەزوۆ، قاسىم امانجولوۆ، شاكەن ايمانوۆ سىندى تاريحي تۇلعالار جەرلەنگەن.
- كوپتەگەن دامىعان ەلدە اشىق اسپان استىنداعى مۋزەي ۇعىمى الدەقاشان قالىپتاسقان. مىسالى، پاريجدە تۋريستەر پياف، بالزاك پەن مورريسوننىڭ قابىرلەرىنە تاعزىم ەتۋ ءۇشىن پەر-لاشەز زيراتىنا بارادى. ۆەنا مەن پراگادا ۇلى كومپوزيتورلاردىڭ ماڭگىلىك مەكەندەرى مادەني مارشرۋتتىڭ اجىراماس بولىگى. لوندوندا حايگەيت زيراتى - ينتەللەكتۋالدىق مۇراعا دەگەن قۇرمەتتىڭ سيمۆولى. الماتى - ەلىمىزدىڭ مادەني استاناسى. بۇل شاھار - ۇلتىمىزدىڭ رۋحاني تىرەگى، تانىمال تۇلعالاردىڭ مەكەنى. ءبىز زيالى تۇلعالاردىڭ ەڭبەكتەرىن ناسيحاتتاپ، قالدىرعان مۇراسىن ساقتاپ، ونى كەيىنگى ۇرپاققا جەتكىزىپ قانا قويماي، ولارعا قۇران باعىشتاپ، زيارات ەتۋگە جاعداي جاساۋعا ءتيىسپىز. ءبىز جوبا اياسىندا ءاربىر بەيىتتىڭ دەرەگىن ناقتىلاپ، كوپشىلىككە قولجەتىمدى بولۋىنا ءمان بەردىك. بۇل باعىتتاعى جۇمىستى ءارى قاراي جالعاستىرامىز، - دەدى الماتى قالاسى مادەنيەت باسقارماسىنىڭ باسشىسى عاني مايلىبايەۆ.
قازىرگى تاڭدا الماتىنىڭ ورتالىق زيراتىندا – 115، كەڭساي-1 دە – 159، ال كەڭساي-2 دە - 109 تۇلعانىڭ بەيىتى كارتاعا ەنگىزىلدى. ولاردىڭ ىشىندە ۇلى وتان سوعىسى ارداگەرلەرى دە بار: ورتالىق زيراتتا – 8، كەڭساي-1 دە – 16، كەڭساي-2 دە - 5 ارداگەر جەرلەنگەن. سونداي-اق قالادا 160 قا جۋىق ەسكەرتكىش بار، ونىڭ 48 ءى - كورنەكتى تۇلعالارعا ارنالعان.
جوبانىڭ جۇزەگە اسۋىنا مادەنيەت باسقارماسىنىڭ وكىلدەرىمەن قاتار، ادەبيەت سىنشىسى، «دارىن» مەملەكەتتىك جاستار سىيلىعىنىڭ لاۋرەاتى ەلدوس توقتارباي، جازۋشى-دراماتۋرگ الىبەك بايبول، جۋرناليست، الاشتانۋشى ۇشقىن ءسايدىراحمان، زەرتتەۋشى زانعار كارىمحان جانە مۋزەيلەر بىرلەستىگىنىڭ قىزمەتكەرلەرى اتسالىسقان.
ەسكە سالايىق، بۇعان دەيىن ەكىباستۇزدا ماجارلىق سوعىس تۇتقىندارىنىڭ زيراتى تابىلعانىن جازعانبىز.
