الماتىدا تاعى دا بازاردان ءورت شىقتى

الماتى. KAZINFORM - الماتىنىڭ ايگىلى «التىن وردا» بازارىندا بىرنەشە نىسان ورتەندى. توتەنشە جاعدايدىڭ بەينەجازباسى الەۋمەتتىك جەلىدە تارادى.

الماتى قالاسى ت ج د مالىمەتىنە سايكەس، بازار اۋماعىنداعى بوس تۇرعان عيماراتتان وت شىققان. قۇتقارۋشىلار وقيعا ورنىنا 9:20-دا اتتانعان.

- 9-قىركۇيەك 9 ساعات 20 مينۋتتا الماتى قالاسىنىڭ ت ج د كۇش-قۇرالدارى ناۋرىزباي اۋدانى تاشكەنت تاسجولى، 17/1-مەكەنجايىنا جىبەرىلدى. كەلگەن ساتتە جۇمىس ىستەمەيتىن ءۇي-جايدىڭ شاتىرى ورتەنگەنى جانە وت ونىڭ جانىنداعى لومبارد شاتىرىنا تارالعانى انىقتالدى. ءورت ورنىنان 1 گاز باللونى (50 ل) ەۆاكۋاتسيالاندى، - دەپ حابارلادى قالالىق ت ج د باسپا ءسوز قىزمەتى.

15 مينۋتتىڭ ىشىندە ءورت وقشاۋلانىپ، 09:48-دە جويىلدى. ابىروي بولعاندا زارداپ شەككەندەر جوق.

ءورتتىڭ سەبەبى انىقتالىپ جاتىر.

ساۋدا ورىندارىنا جاقىن بولعاندىقتان وقيعا ورنىنا جەكە قۇرامنىڭ 48 قۇتقارۋشىسى جانە 14 تەحنيكا جىبەرىلدى. 

ەسكە سالايىق، شىلدە ايىندا الماتىداعى «باراحولكا» بازارىنىڭ ءبىر بولىگى ورتەنگەن ەدى.

اۆتور
دوسبول اتاجان