الماتىدا ەسىرتكى تاراتىپ جۇرگەن پاكىستان مەن ءۇندىستاننىڭ ازاماتتارى ۇستالدى

الماتى. KAZINFORM - الماتىدا ارنايى وپەراتسيا بارىسىندا شەتەلدىكتەردىڭ قىلمىستىق ءىس-ارەكەتتەرى اشكەرەلەندى.

الماتى قالالىق پوليتسيا دەپارتامەنتىنىڭ مالىمەتىنشە، قالادا پاكىستان مەن ءۇندىستاننان كەلگەن ەكى ازاماتى ەسىرتكى بيزنەسىمەن اينالىسقان. ولاردىڭ ءبىرى الماتىداعى جوعارى وقۋ ورىندارىندا وقيدى.

«وزدەرىنىڭ قىلمىستىق ارەكەتىن جۇزەگە اسىرۋ ءۇشىن كۇدىكتىلەر جەكە تۇرعىن ءۇيدى جالعا العان. تۇرعىن ءۇيدى ءتىنتۋ كەزىندە ساتۋعا دايىن اسا ءىرى كولەمدەگى سينتەتيكالىق ەسىرتكى، زەرتحانالىق جابدىقتار، پرەكۋرسورلار تابىلىپ، تاركىلەندى. شەتەلدىكتەردىڭ بىرلەسە جۇمىس ىستەگەنى انىقتالدى، ولاردىڭ ءبىرى ەسىرتكىنى قايناتسا، ەكىنشىسى ونى جاسىرىپ قويۋ ارقىلى تاراتقان. ىزدەستىرۋ شارالارى قاسكويلەردىڭ تۇرعىلىقتى جەرىندە دە جۇرگىزىلدى. ولار سينتەتيكا سالىنعان ورامداردى جاتىن بولمەسىندە ساقتاعان. تاركىلەنگەن سينتەتيكالىق پسيحوتروپتىق زاتتاردىڭ جالپى سالماعى 4 كەلىدەن استى. كۇدىكتىلەر قاماۋعا الىندى»، - دەدى الماتى قالالىق پوليتسيا دەپارتامەنتى باستىعىنىڭ ورىنباسارى قۋاتبەك ناۋاتوۆ.

ەسكە سالساق، باتىس قازاقستان، اباي وبلىستارى مەن الماتى قالاسىندا ەسىرتكىنى ەشقانداي بايلانىسسىز تاسىلمەن تاراتۋعا ماماندانعان ۇيىمداسقان قىلمىستىق توپتار ۇستالدى.