الماتىدا كوشكىننىڭ ءتۇسۋى: ادامدار ەۆاكۋاتسيالانىپ، كەيبىرى ىزدەستىرىلىپ جاتىر

استانا. KAZINFORM - الماتى قالاسىندا جىلجىما تۇسكەن ورىندا اۆاريالىق-قۇتقارۋ جۇمىستارى جۇرگىزىلىپ جاتىر، دەپ حابارلايدى ق ر توتەنشە جاعدايلار مينيسترلىگىنىڭ باسپا ءسوز قىزمەتى.

باسپا ءسوز مالىمەتتەرىنە قاراعاندا، سۋىق سۋمەن جابدىقتاۋ قۇبىرىنىڭ جارىلۋى سالدارىنان توپىراق ىلعالدانىپ، كەيىن كولەمى 3200 تەكشە مەتر بولاتىن جىلجىما تۇسكەن. ەكى جەر ۇيگە، ونىڭ ىشىندە بىرەۋىنە ءىشىنارا زاقىم كەلگەن.

الدىن الا اقپاراتقا سايكەس، ۇيلەردە ءتورت ادام، ونىڭ ىشىندە ەكى بالا بولعان.

وقيعا ورنىندا «قازسەلدەن قورعاۋ» م م، الماتى قالاسىنىڭ «109 قۇتقارۋ قىزمەتى» م م، رەسپۋبليكالىق جەدەل-قۇتقارۋ جاساعىنان، الماتى قالاسى ت ج د، ت ج م 28237 اسكەري بولىمىنەن، جەدەل مەديتسينالىق كومەك بريگاداسىنان، مەدەۋ اۋدانىنىڭ اكىمدىگىنەن 160 تان استام ادام جانە 30 بىرلىك تەحنيكا جۇمىلدىرىلدى.

جاقىن ماڭداعى ۇيلەردىڭ تۇرعىندارى ەۆاكۋاتسيالاندى. ولار № 47-مەكتەپكە ورنالاستىرىلدى. ولارعا تۇنەۋ ورنى، جىلى شاي جانە باسقا دا قاجەتتى كومەك كورسەتىلدى. جينالۋ پۋنكتىنە ورنالاستىرىلعاننان كەيىن بىرنەشە ساعات وتكەن سوڭ، تۇرعىندار ءوز ەركىمەن دوستارى مەن تۋىستارىنا كەتتى.

دارىگەرلەر بريگاداسى كەزەكشىلىك ۇيىمداستىردى. وقيعا ورنىندا ت ج د پسيحولوگيالىق توبى جۇمىس ىستەپ جاتىر. ىقتيمال زارداپ شەككەندەردى ىزدەۋ جالعاسۋدا. ۇيلەردىڭ جاقىن ورنالاسۋى، تەحنيكانى پايدالانۋ مۇمكىندىگىنىڭ بولماۋى جۇمىستاردى قيىنداتۋدا.

اقپارات تولىقتىرىلاتىن بولادى. تەك رەسمي دەرەكتەرگە سەنۋدى سۇرايمىز.