الماتىدا قىتايداعى قازاقستان تۋريزم جىلى جابىلدى
الماتى. KAZINFORM - الماتى قالاسىندا قىتايداعى قازاقستان تۋريزم جىلىنىڭ جابىلۋ سالتاناتى ءوتىپ جاتىر.
الماتىدا قىتايداعى قازاقستان تۋريزم جىلىنىڭ جابىلۋىنا ارنالعان حالىقارالىق فورۋم ۇيىمداستىرىلدى.
وعان ەكى ەلدىڭ تۋريزم يندۋسترياسىنىڭ 300 دەن استام وكىلى قاتىستى. فورۋم اياسىندا قىتايداعى قازاقستان ءتۋريزمىنىڭ جىلى قورىتىندىلاندى.
- قىتايداعى قازاقستان تۋريزم جىلىنىڭ اشىلۋ سالتاناتى بەيجىڭ قالاسىندا وتسە، جابىلۋ سالتاناتىنا قوناقجاي الماتىدا جينالىپ وتىرمىز. مۇنىڭ دا سايكەستىگى بار، بەيجىڭ مەن الماتى ەلدەرىمىز اراسىنداعى ەڭ سۇرانىسقا يە باعىتتار. شەكارا قىزمەتىنىڭ دەرەكتەرىنە سايكەس قازاقستاندىقتاردىڭ قىتايعا ساپارى %31 عا، ال قىتايدان قازاقستانعا كەلگەن مەيماندار قاتارى %50 عا ارتا ءتۇستى. بۇل كورسەتكىشتەر قىتايداعى قازاقستان تۋريزم جىلى اياسىندا اتقارىلعان جوبالاردىڭ ناقتى ناتيجە بەرىپ جاتقانىن سەنىمدى تۇردە كورسەتەدى. بيىل 30 دان استام ىسكەرلىك جانە مادەني ءىس-شارالار ءساتتى ءوتتى. بۇل حالىقتارىمىز اراسىنداعى ءوزارا قىزىعۋشىلىقتى ارتتىرۋعا ىقپال ەتتى،-دەدى قازاقستان رەسپۋبليكاسى تۋريزم جانە سپورت ءمينيسترىنىڭ ورىنباسارى ەرجان ەركىنبايەۆ.
ال قىتايدىڭ الماتىداعى باس كونسۋلى جياڭ ۆەي ەكى ەل اراسىنداعى اۋە رەيستەردىڭ كوبەيگەنىن اتاپ ءوتتى.
- قىتايداعى قازاقستان تۋريزم جىلى جاريالانعان ساتتەن باستاپ، ەكى ەلدىڭ مادەني جانە تۋريستىك ۇيىمدارى ءارتۇرلى ءىس-شارالار وتكىزە باستادى. قونايەۆ، تۇركىستان قالالارىندا ۇلى جىبەك جولىن زەرتتەۋ بويىنشا ۇلكەن جۇمىستار اتقارىلدى. سونىمەن قاتار، قازاقستان مەن قىتاي اراسىندا ءبىر اپتاداعى اۋە رەيستەرى 70 كە جۋىقتادى. قىتايدىڭ بارلىق ءىرى قالالارىنان تىكەلەي رەيستەر اشىلدى. ەندى كەلەسى جىلى قازاقستاندا قىتاي ءتۋريزمىنىڭ جىلى وتەدى. سوندىقتان ءبىز قازاقستاندىق مەيمانداردى اسىعا كۇتەمىز، - دەدى قىتايدىڭ الماتىداعى باس كونسۋلى جياڭ ۆەي.
ايتا كەتكەن ءجون، وتكەن جىلى مەملەكەت باسشىسى قاسىم-جومارت توقايەۆتىڭ قىتايعا رەسمي ساپارى بارىسىندا 2024 -جىل - «قىتايداعى قازاقستان تۋريزم جىلى» دەپ جاريالانعان بولاتىن.
ەسكە سالايىق، ناۋرىز ايىندا بەيجىڭ قالاسىندا قىتايداعى قازاقستان تۋريزم جىلى حالىقارالىق تۋريزم مەن ينۆەستيتسيالارعا ارنالعان فورۋمنان باستالعانىن جازعانبىز.
سونداي-اق، بۇعان دەيىن قازاق-قىتاي فورۋمىندا ديماش قۇدايبەرگەننىڭ جاڭا بەينەبايانى تانىستىرىلعانىن حابارلاعان ەدىك.
