الماتىدا قانداي جاڭا مادەني نىساندار سالىنادى

الماتى. KAZINFORM - بۇگىن - قازاقستاندا مادەنيەت جانە ونەر قىزمەتكەرلەرىنىڭ كۇنى.

كاسىبي مەرەكەگە وراي الماتى قالاسى مادەنيەت باسقارماسىنىڭ باسشىسى عاني مايلىبايەۆ ونەر مەن رۋحانيات سالاسىنداعى جەتىستىكتەردى سارالاپ، الداعى جوسپارلارمەن ءبولىستى.

ونىڭ ايتۋىنشا، بۇگىنگى كۇنى ەلىمىزدىڭ مادەني استاناسى - الماتىدا 12 تەاتر، 35 كىتاپحانا، 25 مۋزەي، 20 عا جۋىق كينوتەاتر مەن وزگە دە مادەني وشاقتار جۇمىس ىستەيدى. الماتى اكىمدىگىنە قاراستى مەكەمەلەر قاتارىندا - «الاتاۋ» ءداستۇرلى ونەر تەاترى، مەملەكەتتىك قۋىرشاق تەاترى، «الماتى اۋەندەرى» شىعارماشىلىق ۇجىمدارى، قازاق مەملەكەتتىك سيركى، 8 مۋزەيدەن تۇراتىن الماتى مۋزەيلەر بىرلەستىگى، مەملەكەتتىك ارحيۆ، الماتى حايۋاناتتار باعى مەن ورتالىقتاندىرىلعان كىتاپحانالار جۇيەسىنە كىرەتىن 28 كىتاپحانا بار. بۇل ۇيىمداردا 2 مىڭنان استام مادەنيەت قىزمەتكەرى ەڭبەك ەتەدى.

مادەنيەت باسقارماسىنىڭ مالىمەتىنشە، الداعى ۋاقىتتا الماتىدا مادەني نىسانداردىڭ سانى ارتادى. اتاپ ايتقاندا:

- جۋىردا جاستار تەاترى مەن جاڭا كورمە ورتالىعىنىڭ قۇرىلىسى باستالادى.

- ينكليۋزيۆتى مادەنيەت ءۇيىنىڭ جوبالاۋ-سمەتالىق قۇجاتتاماسى ازىرلەنىپ جاتىر.

- بورالداي قورعاندارىندا ساق مادەنيەتى ورتالىعىنىڭ قۇرىلىسى باستالادى.

- ت م د ەلدەرى ىشىندە العاشقى بالالار عىلىم مۋزەيى مەن Observatorium مۋزەيىنىڭ اشىلۋى، رايىمبەك باتىر كەشەنىن مۋزەيلەندىرۋ مەن الماتى مۋزەيىنىڭ جاڭا ەكسپوزيتسياسىن قالىپتاستىرۋ جۇمىستارى باستالادى.

سونىمەن قاتار 2029 -جىلعا دەيىن قالادا وزىنە- ءوزى قىزمەت كورسەتۋ جۇيەسىمەن جابدىقتالعان 20 جاڭا كىتاپحانا اشۋ كوزدەلگەن.