الماتىدا موتوسيكل قاعىپ، ەكى جول جۇمىسشىسى مەرت بولدى

الماتى. KAZINFORM - الماتىدا جول-كولىك وقيعاسى ەكى ادامنىڭ ءومىرىن قيدى.

الماتى قالاسى پوليتسيا دەپارتامەنتىنىڭ مالىمەتىنشە، جول اپاتى 9-ءساۋىر ساعات 1:30 شاماسىندا الاتاۋ اۋدانىندا بولعان. موتوسيكل جۇرگىزۋشىسى رىسقۇلوۆ داڭعىلىمەن باتىس باعىتتا كەلە جاتىپ، الدىمەن جەڭىل كولىككە سوقتىعىسقان. كەيىن قوزعالىسى توقتاماعان كۇيدە جول جۇمىستارىن جۇرگىزىپ جاتقان 3 جۇمىسشىنى ( ەكى ەر، ءبىر ايەل ادام) قاعىپ كەتكەن.

- وكىنىشكە قاراي، ەكى ەر ادام وقيعا ورنىندا كوز جۇمدى. ال ايەل اۋىر حالدە قالالىق اۋرۋحانالاردىڭ بىرىنە جەتكىزىلدى. پوليتسيانىڭ انىقتاۋ باسقارماسى ەكى ادامنىڭ ولىمىنە اكەپ سوقتىرعان جول-كولىك وقيعاسىنا بايلانىستى قىلمىستىق ءىس قوزعادى، - دەپ حابارلادى دەپارتامەنتتەن.

ەسكە سالايىق، بۇعان دەيىن الماتى وبلىسىندا داۋىل كەزىندە اعاش قۇلاپ، ەر ادام مەرت بولعانىن جازعانبىز.

اۆتور

دوسبول اتاجان