الماتىدا ەلەكتروموبيل قۋاتتايتىن ستانسيالار ورناتىلادى
الماتى. KAZINFORM - الماتىدا ەلەكتروموبيلدەرگە ارنالعان زاريادتاۋ ستانسيالارىن ورناتۋعا 163 ميلليون تەڭگە ءبولىندى.
الماتى اكىمدىگىنەن ءمالىم ەتكەندەي، «الماتى» الەۋمەتتىك-كاسىپكەرلىك كورپوراتسياسى» ا ق ەنشىلەس ۇيىمى، «Almaty Finance» ج ش س ەلەكتروموبيلدەرگە ارنالعان جوعارى جىلدامدىقتى زاريادتاۋ ستانسيالارىن ساتىپ الۋعا 163 ميلليون تەڭگە ءبولدى.
اتالعان سوماعا الماتىدا 28 جاڭا قۋاتتاۋ ستانسياسى ورناتىلادى.
«2023-جىلى الماتىدا اۆتوكولىك قۇرالدارىنىڭ زياندى زاتتار شىعارىندىلارىنىڭ كولەمى 112 مىڭ توننادان استى، بۇل شىعارىندىلاردىڭ جالپى كولەمىنىڭ %60 قۇرادى. ەلەكتروموبيلدەرگە كۇتىم جاساۋ ءۇشىن قولايلى جاعداي جاساۋ كولىكتى ەلەكترلەندىرۋ جولىنداعى ماڭىزدى قادام. ناتيجەسىندە قالا ەكولوگياسى جاقسارادى»، - دەپ اتاپ ءوتتى «Almaty Finance» ج ش س باسقارما ءتوراعاسىنىڭ ورىنباسارى جۇلدىز يگەنوۆ.
بۇعان دەيىن قازاقستاندا 2023-جىلى ەلەكتروموبيلدەر سانى 10,4 ەسە وسكەنى تۋرالى جازعان بولاتىنبىز.
ساراپشىلاردىڭ پىكىرىنشە، بۇعان قازاقستاندىقتارعا كولىكتىڭ ەكولوگيالىق تازا تۇرىنە كوشۋى ءۇشىن مەملەكەت بەرەتىن كۆوتا سەبەپ بولدى. ويتكەنى ەلەكتروموبيلدىڭ اتموسفەراعا زيانى جوق. سوندىقتان مەملەكەت ونى ساتىپ العاندا كەدەن جانە سالىق تولەمدەرىنەن بوساتاتىن كۆوتا بەردى. مىنە، وسىدان كەيىن ساتىپ الۋشىلار كوبەيدى. بىلتىر قاڭتار-قازاننىڭ وزىندە قازاقستانعا كۆوتا بويىنشا 6875 ەلەكتروموبيل اكەلىندى.
