الماتىدا كوكجوتەلمەن اۋىرعاندار كوبەيگەن

الماتى. KAZINFORM - الماتى قالاسىنىڭ سانيتاريالىق- ەپيدەميولوگيالىق باقىلاۋ دەپارتامەنتىنىڭ مالىمەتىنە سايكەس، مەگاپوليستە 5 ايدا ەكپە الماعان 14 جاسقا دەيىنگى بالالار اراسىندا كوكجوتەلدىڭ 62 راستالعان جاعدايى تىركەلگەن. سونداي-اق ناۋقاستارمەن بايلانىستا بولعان 334 ادام تەكسەرىلدى، ولار ىندەت جۇقتىرماعان.

الماتى قالاسىنىڭ سانيتاريالىق-ەپيدەميولوگيالىق باقىلاۋ دەپارتامەنتىنىڭ باسشىسى قاسىمحان الپىسباي ۇلى اتالعان اۋرۋ اۋا ارقىلى تارايتىنىنى ايتتى.

- كوكجوتەل - Bordetella pertussis تاياقشاسىنان تۋىنداعان، قۇسۋمەن جانە قالىڭ تۇتقىر قاقىرىقتى بولۋمەن سيپاتتالاتىن قالشىلداتقان جوتەلدىڭ ەرەكشە شابۋىلدارىمەن سيپاتتالاتىن جەدەل رەسپيراتورلىق باكتەريالىق جۇقپا. كوكجوتەلدىڭ قوزدىرعىشى اۋا تامشىلارىمەن ناۋقاس جوتەلگەندە، تۇشكىرگەندە، سويلەسكەندە تارالادى، - دەدى ول.

سونداي-اق سەب باسشىسى كوكجوتەلدىڭ اسقىنۋى وكپەنىڭ قابىنۋى (پنەۆمونيا)، ميدىڭ زاقىمدانۋى سياقتى اۋرۋلارعا الىپ كەلۋى مۇمكىن ەكەنىن اتاپ ءوتتى.

ونىڭ ايتۋىنشا، اۋرۋ اسىرەسە بىرنەشە ايلىق سابيلەرگە اۋىر سوعادى.

- بىرىنشىدەن، بالادا قاراپايىم سۋىقتىڭ بەلگىلەرى پايدا بولادى: مۇرىننىڭ اعۋى، بەزگەك، قالىپتى جوتەل. بىرتە-بىرتە جوتەل كۇشەيىپ، ۇستامالى جوتەلگە اينالادى. وسى السىرەتەتىن جوتەل ۇستاماسى كەزىندە ميدىڭ قان اينالىمى بۇزىلادى، وتتەگى اشىعۋى ناتيجەسىندە پسيحيكانىڭ بۇزىلۋى جانە ءارتۇرلى دارەجەدەگى اقىل- وي كەمىستىگى پايدا بولادى. كوكجوتەلدەن قورعاۋدىڭ جالعىز سەنىمدى جانە ءتيىمدى ءادىسى - ۆاكسيناتسيا، - دەدى قاسىمحان الپىسباي ۇلى.

ايتا كەتكەن ءجون، س ە ب دەپارتامەنتى تاراپىنان اۋرۋدىڭ بەلگىلەرى پايدا بولعان كەزدە مىنانداي كەڭەس بەرىلەدى:

- ۋاقتىلى مەديتسينالىق كومەككە جۇگىنۋ، ءوزىن- ءوزى ەمدەمەۋ، تەك دارىگەردىڭ نۇسقاۋى بويىنشا ەم قابىلداۋ؛
- بولمەنى ءجيى جەلدەتىپ، دىمقىل تازالاۋ جۇرگىزۋ؛
- جوتەلگەن كەزدە اۋىزدى جابۋ، قولدى ءجيى جۋۋ؛
- اتا-انالارعا ناۋقاس بالالاردى ۇيىمداسقان ۇجىمدارعا، مەكتەپ پەن بالاباقشاعا جىبەرمەۋ.

اۆتور
دوسبول اتاجان