الماتىدا كوكپار كلۋبىندا حاكىم ابايدىڭ ەرتوقىمى ساقتاۋلى تۇر
الماتى. KAZINFORM - الماتىداعى داۋكەي كوكپار كلۋبىندا كەزىندە اباي قۇنانباي ۇلى قولدانعان ەرتوقىم بار. كونە جادىگەر اتادان بالاعا مۇرا بولىپ قالعان.
رەسپۋبليكالىق شاعىن كوكپار 3x3 ۇلتتىق فەدەراتسياسىنىڭ باسشىسى نۇربول بورىبەكتىڭ ايتۋىنشا، ەرتوقىم - قازاقتىڭ ەڭ كوپ پايدالاناتىن مۇلكىنىڭ ءبىرى، باعالى تۇرمىستىق زاتى.
باعزى زاماندا بابالارىمىز ۇيىنە كەلگەن مەيماننىڭ مىنگەن اتى مەن ابزەلدەرىنە قاراپ-اق ونىڭ قاي رۋدان، قاي جەردەن كەلگەنىن جازباي تانىپ، دارەجەسىنىڭ دەڭگەيىن، قاي ءوڭىردىڭ تۋماسى ەكەنىن دە ايىرىپ وتىرعان.
- حالىق اراسىندا ەردىڭ جاسالۋ ۇلگىسىنە قاراي «ارعىن ەرى»، «نايمان ەرى»، دەگەن تۇرلەرىن دە كەزدەستىرۋگە بولادى. ەتنوگرافتاردىڭ ايتۋىنشا، مىنا ەرتوقىم ورتا جۇزگە تيەسىلى. بۇل ەرتوقىمعا اباي اتامىزدىڭ وتىرعانى، جامباسى تيەگەنى حاق. بۇل تاريحي جادىگەردى دانيار داۋكەيگە عارىشكەر توقتار اۋباكىروۆ سىيعا تارتقان. بۇل كىسىلەر اتالاس بولىپ كەلەدى، - دەيدى نۇربول بورىبەك.
بۇل بۇيىمعا شامامەن 150 جىل بولعان.
- ەل اراسىندا نايمان ەر دەگەن اتى بار. شامامەن 1,5 عاسىر بولعان. كولەمى ايتارلىقتاي ۇلكەن ەمەس. سوعان قاراعاندا حاكىم اباي جاستىق شاعىندا قولدانعان بولۋى كەرەك. اعاشتان جاسالىپ، كۇمىسپەن كومكەرىلگەن، - دەدى ول.
ايتا كەتەيىك، ابايدىڭ «جيدەباي- ءبورىلى» مەملەكەتتىك تاريحي-مادەني جانە ادەبي-مەموريالدىق قورىق مۋزەيىندە اباي (يبراھيم) قۇنانباي ۇلى مەن ونىڭ اينالاسىندا عۇمىر كەشكەن تۋىستارىنىڭ جاقىن ادامدارىنىڭ ەرتوقىمدارى ساقتالعان.
مۋزەيدىڭ اسىل قورىنداعى جەتى ەر-توقىم دا بۇگىنگى كۇنى الىس-جاقىننان ابايىن تانۋعا اسىعىپ جەتەتىن الاش بالاسى مەن «ادامزاتتىڭ ابايىن» بىلۋگە قۇشتار قيىردان كەلەتىن قوناقتاردىڭ نازارىنا ۇسىنىلعان.
اۆتور
الما مۇقانوۆا
