الماتىدا جىلىتۋ ماۋسىمى قاشان باستالادى

الماتى. KAZINFORM - الماتى اكىمدىگى مەگاپوليستە جىلىتۋ ماۋسىمى قاشان باستالاتىنىن حابارلادى. وتكەن جىلى الماتىدا 10-قازاننان باستاپ جىلۋ بەرىلگەن بولاتىن.

- جىلىتۋ ماۋسىمىن دايىنداۋ جانە وتكىزۋ قاعيدالارىنا سايكەس، الماتىدا وبەكتىلەردى كەزەڭ- كەزەڭىمەن جىلۋعا قوسۋ قالا اۋماعىندا اۋانىڭ تۇراقتى ورتاشا تاۋلىكتىك تەمپەراتۋراسى 5 تاۋلىك بويى +8 گرادۋس جانە ودان تومەن بولعان كەزدە ۋاكىلەتتى ورگاننىڭ قاۋلىسى نەگىزىندە باستالادى، - دەپ حابارلادى اكىمدىكتەن.

ايتا كەتكەن ءجون، قالا عيماراتتارىنا تومەندەگى رەت بويىنشا جىلۋ بەرىلەدى:

- مەكتەپ، ەمحانا جانە مەديتسينالىق-الەۋمەتتىك مەكەمەلەر؛

- تۇرعىن ۇيلەر، جاتاقحانالار، قوناقۇيلەر؛

- اكىمشىلىك عيماراتتار، وقۋ ورىندارى، تەاترلار؛

- باسقا عيماراتتار.

ەسكە سالايىق، بۇعان دەيىن الماتىدا قالا كۇنىندە قايدا بارۋعا بولاتىنىن جازعانبىز.