الماتىدا جولاۋشىلار اۆتوبۋس جۇرگىزۋشىسىن ۇرىپ، ەسىنەن تاندىردى
الماتى. KAZINFORM - الماتىدا ءبىر توپ بۇزاقى اۆتوبۋستاعى جولاۋشىنى، ودان كەيىن قوعامدىق كولىكتىڭ جۇرگىزۋشىسىن ۇرىپ تاستادى. وقيعا بەينەجازباسى الەۋمەتتىك جەلىدە تارادى.
بەينەجازبادان اۆتوبۋس سالونىندا جولاۋشىلار اراسىندا جانجال شىققانىن كورۋگە بولادى. ولاردى اجىراتۋعا بارعان كولىك جۇرگىزۋشىسىنىڭ ءوزى دە سوققىنىڭ استىنا قالىپ، ەسىنەن تانىپ قالعان.
الماتى قالاسىنىڭ پوليتسيا دەپارتامەنتى جانجالعا قاتىسۋشىلاردىڭ ارەكەتىنە قۇقىقتىق باعا بەرىلەتىنىن حابارلادى.
- اتالعان دەرەك بويىنشا جەتىسۋ اۋداندىق پوليتسيا باسقارماسى تەرگەۋ جۇرگىزىپ جاتىر. قاقتىعىسقا قاتىسۋشىلاردىڭ كىم ەكەنى جانە الدىن الا ءمان-جايلار انىقتالدى. ولاردىڭ ءارقايسىسىنىڭ ارەكەتىنە قۇقىقتىق باعا بەرىلەتىن بولادى، - دەپ حابارلادى قالالىق پوليتسيا دەپارتامەنتىنىڭ باسپا ءسوز قىزمەتى.
ەسكە سالايىق، بۇعان دەيىن الماتى پوليتسياسىنىڭ قىزمەت كورسەتۋ ورتالىقتارىندا قانداي قىزمەت الۋعا بولاتىنىن جازعانبىز.
