الماتىدا جەرلەۋ قىزمەتى مەن مارقۇمعا بولىنەتىن ورىننىڭ باعاسى قانشا

الماتىدا مارقۇمداردى جەرلەۋ ءراسىمى اقىلى ءارى زيراتتاردا مارقۇمدارعا بولىنەتىن ورىنداردىڭ باعاسى وسكەن.

بۇل تۋرالى الەۋمەتتىك جەلىدە الماتى تۇرعىنى جازدى، دەپ حابارلايدى Kazinform.

قالا تۇرعىنىنىڭ ايتۋىنشا، ول 2006-جىلى العاش رەت مارقۇمدى جەرلەۋ ءراسىمىن كورگەن.

«جەرلەۋ ءراسىمىن العاش رەت 2006-جىلى قۇربىمنىڭ اكەسى قايتىس بولعان كەزدە كوردىم. ءبىز ونى جەرلەيتىن ورىندى تابۋ ءۇشىن بورالدايعا باردىق. زيرات اكىمشىلىگىنىڭ وكىلى مۇندا ءبىر ورىن 300 دوللار، ەكى ورىن 500 دوللار تۇراتىنىن ايتتى، تەگىن جەر تۋرالى اڭگىمە دە بولعان جوق. 2020-جىلى مەنىڭ اكەم قايتىس بولدى. اكەمدى جەرلەگەن سوڭ، Facebook-تە مەن مارقۇمدى جەرلەۋگە قازىر كوپ قارجى كەتەتىنى تۋرالى كوپ پوست وقىدىم»، - دەپ جازدى قالا تۇرعىنى.

اتالعان ماسەلە بويىنشا الماتى اكىمدىگىنە ساۋال جولداعان ەدىك. اكىمدىكتىڭ مالىمەتىنشە، ق ر جەر كودەكسىنىڭ 109-بابى، 3-تارماعى بويىنشا زيراتتار ورنالاسقان جانە ولارعا ارنالعان جالپى پايدالانىمداعى جەرلەردەن كەنتتىڭ ءاربىر قايتىس بولعان تۇرعىنىنا نەمەسە وسى كەنتتە قايتىس بولعان تۇرعىلىقتى جەرى جوق ادامعا جەرلەۋ ءۇشىن كەمىندە التى شارشى مەتر جەر تەلىمى تەگىن بولىنەدى.

«ياعني، قازاقستاننىڭ كەز كەلگەن ازاماتى قايتىس بولعان جاعدايدا، مەملەكەت جەرلەۋگە جەر تەلىمىن بەرۋ قۇقىعىنا كەپىلدىك بەرەدى. ەرەجەگە سايكەس جەرلەۋگە جەر ءبولۋ ءۇشىن ءولىم فاكتىسىن تىركەيتىن ورگاندار بەرەتىن مەديتسينالىق كۋالاندىرۋ نەگىز بولىپ تابىلادى. ءوز كەزەگىندە «الماتى قالاسىنىڭ مامانداندىرىلعان سالتتىق قىزمەت كورسەتۋ كومبيناتى» ج ش س بەلگىلەنگەن تارتىپپەن بەكىتىلگەن پرەيسكۋرانتقا سايكەس، سونداي-اق، ق ر- نىڭ قولدانىستاعى سانيتارلىق نورمالارى مەن ەرەجەلەرىنە سايكەس سالتتىق قىزمەتتەر كورسەتەدى. بۇگىنگى كۇنى الماتى قالاسىندا 9 زيرات بار، ونىڭ ىشىنە «كەڭساي – 2»، «باتىس» (بورالداي) زيراتتارى دا كىرەدى، وندا جەرلەۋ ءۇشىن بوس جەر ۋچاسكەلەرى بار»، - دەپ حابارلادى اكىمدىكتەن.

اكىمىدك، سونداي-اق اقشانى بوپسالاۋ فاكتىسى بولعان جاعدايدا، قۇقىق قورعاۋ ورگاندارىنا جۇگىنۋگە بولاتىنىن ەسكەرتتى.

«ودان بولەك، سەرىكتەستىك اكىمشىلىگىنە كەلەسى تەلەفون نومىرلەرى ارقىلى حابارلاسۋعا بولادى: 87273975776 الماتى قالاسى «م س ق ك ك» ج ش س قابىلداۋ بولمەسى، 87273907687 الماتى قالاسى «م س ق ك ك» ج ش س ينجەنەرلىك ءبولىمى نەمەسە الماتى قالاسى، قايىربەكوۆ كوشەسى، 7-ۇيگە كەلىپ جولىعۋعا بولادى. جوعارىدا اتالعان دەرەكتەر بويىنشا سەرىكتەستىك باسشىلىعى جاۋاپسىز قىزمەتكەرلەرگە قاتىستى تۇبەگەيلى شارالار قابىلداپ جاتىر، سونداي-اق، كەيبىر قىزمەتكەرلەر بۇرىن اتالعان فاكتىلەر بويىنشا قىلمىستىق جاۋاپقا تارتىلعانىن مالىمدەيمىز»، - دەپ جازدى الماتى اكىمدىگى.