الماتىدا شۆەتسيادان كەلگەن دارىگەر 7 قازاقستاندىققا تەگىن وپەراتسيا جاسادى
الماتى. KAZINFORM - كارديولوگيا جانە ىشكى اۋرۋلار عىلىمي-زەرتتەۋ ينستيتۋتىندا شۆەتسيادان كەلگەن پروفەسسوردىڭ جەتەكشىلىگىمەن كۇردەلى وپەراتسيالار جاسالدى.
كارولينسك ينستيتۋتىنىڭ (ستوكگولم، شۆەتسيا) پروفەسسورى ناۋزاد سالەحتىڭ جەتەكشىلىگىمەن 7 پاتسيەنتكە قولقا قاقپاقشاسىن ەندوۆاسكۋليارلىق اۋىستىرۋ بويىنشا وپەراتسيا جاسالدى.
قولقا - جۇرەكتەن شىعاتىن ءىرى قانتامىر. سول قانتامىر جۇمىسىندا اقاۋ شىقسا جانە باسقا اۋرۋلارمەن قاتار بولسا، پاتسيەنتتىڭ جۇرەگىنە اشىق وپەراتسيا جاساۋ قاۋىپتى. مۇنداي جاعدايدا قولقا قاقپاقشاسىن اۋىستىرۋ رەنتگەندىك باقىلاۋمەن جامباس ارتەرياسىن تەسۋ ارقىلى جاسالادى. ءبىراق ەڭ باستىسى جۇرەكتى توقتاتپاي جانە جاساندى قان اينالىمىن پايدالانباي ورىندالادى. مەديتسينادا بۇل وپەراتسيانى TAVI دەپ اتايدى.
ناۋقاستاردىڭ ءبىرى - 87 جاستاعى ميحايل فەدوروۆيچ، قولقا قاقپاقشاسىنىڭ اۋىر ستەنوزىنا شالدىققان. ونى جۇرەك تۇسىنداعى اۋىرسىنۋ، تىنىشتىقتا دا پايدا بولاتىن جۇرەك سوعىسى، ەنتىگۋ، باس اۋرۋى مازالاعان. ول 1 جىل بۇرىن ەنتىگۋ كۇشەيگەن كەزدە دياگنوزىن بىلگەن. كارديولوگيا جانە ىشكى اۋرۋلار عىلىمي-زەرتتەۋ ينستيتۋتىنا ەلىمىزدەگى جەتەكشى ينتەرۆەنتسيالىق كارديولوگ الەكسەي كولەسنيكوۆقا جۇگىنۋ ۇسىنىلعان. وپەراتسيا ءساتتى ءوتتى.
- TAVI - ەڭ قىمبات وپەراتسيالاردىڭ ءبىرى، ءبىراق پاتسيەنتتەر ءۇشىن تەگىن. ءبىز حالىققا جوعارى بىلىكتى كارديوحيرۋرگيالىق كومەك كورسەتۋدى جاقسارتۋ بويىنشا ۇزدىكسىز جۇمىس جۇرگىزىپ جاتىرمىز. كلينيكانىڭ ينتەرۆەنسيالىق كارديولوگتارىنىڭ جوعارى كاسىبي شەبەرلىگى ەڭ كۇردەلى وپەراتسيالاردى جاساۋعا مۇمكىندىك بەرەدى، - دەپ اتاپ ءوتتى كارديولوگيا جانە ىشكى اۋرۋلار عىلىمي-زەرتتەۋ ينستيتۋتىنىڭ باسشىسى مارات پاشيموۆ.
وسىعان دەيىن كارديولوگيا جانە ىشكى اۋرۋلار عىلىمي-زەرتتەۋ ينستيتۋتىنىنىڭ دارىگەرلەرى رەسەيلىك ارىپتەستەرمەن بىرلەسىپ كۇردەلى جۇرەك ىرعاعىنىڭ بۇزىلۋىن ەمدەۋگە ارنالعان قۇرىلعىنىڭ كومەگىمەن بەس كۇندە 30 وپەراتسيا جاساعان بولاتىن.
