الماتىدا «ءۇمىت شۋاعى» كورمەسى ءوتىپ جاتىر
الماتى. KAZINFORM - الماتىدا قازاقستاندىق سۋرەتشى گۇلنۇر مۇقاجانوۆانىڭ ەكىنشى جەكە كورمەسى اشىلدى.

گۇلنۇر مۇقاجانوۆانىڭ ءوزى بەرليندە تۇرادى. قولونەر شەبەرى كيىزبەن جۇمىس ىستەيدى. ءتۇرلى-ءتۇستى ءجۇن مەن جىبەكتەن جاسالعان كيىزدى قولدانا وتىرىپ، تەكستۋرا جانە كەڭىستىكتى ناعىز شەبەرلىكپەن ۇيلەستىرىلگەن كۇردەلى كومپوزيتسيالاردى جاسايدى.

«ءۇمىت شۋاعى» دەپ اتالاتىن كورمەگە 20 عا جۋىق جۇمىسى قويىلدى. كەلۋشىلەر، اسىرەسە، كيىزدەن جاسالعان تۋىندىسىنا قىزىعۋشىلىق تانىتىپ جاتىر.
«ءۇمىت شۋاعى» كورمەسى - بۇل قالىپتاسقان ءارى قازىرگى زامانعى قازاقستانعا دەگەن سىني كوزقاراس تۋراسىندا. بۇل كورمە - جەكە جوبا ەمەس، بۇل مەنىڭ ءمان-ماعىنا ىزدەۋ جولىنداعى تاجىريبەمنىڭ ءبىر بولىگى. ءوز جۇمىستارىم ارقىلى مەن ءۇمىت تۋرالى ايتىپ وتىرامىن، ويتكەنى ەشنارسەگە قاراماستان، سول ءۇمىتتى جوعالتقىم كەلمەيدى»، - دەيدى گۇلنۇر مۇقاجانوۆا.

الماتىداعى كورمە ءۇشىن گۇلنۇر ءوزىنىڭ 16 مەترلىك كيىز سۋرەتىنىڭ جالعاسىن جاساپ شىعاردى. وندا ەلىمىزدىڭ وتكەنى، بۇگىنى جانە بولاشاعى ءارتۇرلى تۇستەر ارقىلى ورىلەدى. الدىمەن سۋرەتى سالىنىپ، ودان كەيىن ۇستىنە كيىز تۇسكەن. تاقىرىپتى تاعى 16 كارتينا جالعايدى. وسىلاي ينستاللياتسيانىڭ ۇزىندىعى 41 مەترگە جەتكەن.
«مەنىڭ شىعارماشىلىعىم ەلىمە ارنالعان. اتا- بابالارىمىزدان جەتكەن باي مۇرانى الەمگە تانىتقىم كەلەدى. تۇسىنە بىلگەن ادامعا ءارقايسىسىندا ماعىنا جاتىر. ءاربىرى مادەنيەتىمىزبەن سالت-داستۇرىمىزدەن حابار بەرەدى. شەت جەردە بولسىن، وسىندا بولسىن، قىزىعۋشىلىق تانىتىپ، سۇراپ جاتادى»، - دەدى ول.

گالەرەيا ديرەكتورى مەرۋەرت قاليەۆانىڭ ايتۋىنشا، جۇمىس كۇردەلى جانە ەرەكشە.
«سۋرەتشى كيىزدى ينستاللياتسيا دەڭگەيىنە جەتكىزە ءبىلدى. ءتۇرلى-ءتۇستى ءجۇن مەن ماتانى، تەرىنى قولدانا وتىرىپ جاسالعان كۇردەلى كومپوزيتسيالاردىڭ بوياۋى ەرەكشە. ءبىر تۇستەن كەلەسى تۇسكە وتۋدە وزىندىك قولتاڭبا قالىپتاستىرعان. وسىنداي شىعارمالار ارقىلى حالقىمىزدىڭ تاريحى مەن مادەنيەتى ساقتالادى»، - دەدى ول.
جاس سۋرەتشى بۇعان دەيىن گونكونگ، بەرلين، لوندون، ۆەنەتسيا سياقتى بىرنەشە قالادا وتكەن ۇلكەن كورمەلەرگە قاتىسقان.
اۆتور
الما مۇقانوۆا