الماتىدا «التىن جاس» باعدارلاماسىمەن 355 زەينەتكەر جۇمىسقا ورنالاستى
الماتى. KAZINFORM - الماتىدا «التىن جاس» باعدارلاماسى ارقىلى زەينەت جاسىنان اسقان 355 تۇرعىن جۇمىسقا ورنالاستى. زەينەتكەرلەردى جۇمىسقا ورنالاستىرۋعا ارنالعان الەۋمەتتىك باعدارلاما جاز كەزىندە العاش رەت ىسكە قوسىلدى.
الماتى اكىمدىگىنىڭ مالىمەتىنشە، ماماندار باعدارلامانى باستاماس بۇرىن زەينەتكەرلەر اراسىندا ساۋالناما جۇرگىزگەن. ونىڭ ناتيجەسى 80 جاسقا دەيىنگى زەينەتكەرلەردىڭ جارتىسىنا جۋىعى ەڭبەك ەتكىسى كەلەتىنىن كورسەتكەن.
«ءاربىر جۇمىس بەرۋشى ەگدە جاستاعى قىزمەتكەردى جۇمىسقا الا بەرمەيدى. زەينەتكەرلەردىڭ تاجىريبەسى مەن ەنەرگياسى ءۇشىن «التىن جاس» باعدارلاماسى وتە ءتيىمدى بولدى. ونىڭ ەرەكشەلىگى - زەينەتكەرلىك جاستاعى ادامداردى جۇمىسقا قابىلدايتىن جۇمىس بەرۋشىلەرگە قىزمەتكەر جالاقىسىنىڭ %50 ى سۋبسيديالانادى، ءبىراق سۋبسيديالاناتىن سوما 85 مىڭ تەڭگەدەن اسپاۋى كەرەك»، - دەپ حابارلادى اكىمدىكتەن.
«التىن جاس» باعدارلاماسىنا قاتىسۋدىڭ باستى تالاپتارى - الماتىدا تىركەلۋ جانە مەگاپوليستە تۇراقتى تۇرۋ. باعدارلاماعا قاتىسۋعا ءوتىنىشتى ونلاين رەجيمىندە a.jas@almaty.gov.kz ارقىلى نەمەسە ەڭبەك موبيلدىلىگى ورتالىعىنا (دوستىق داڭعىلى، 85, 2 قابات، كاب. 201 ا) بارىپ بەرۋگە بولادى.
71 جاستاعى ەربولات مۇستافين «التىن جاس» باعدارلاماسى ارقىلى جەكە كومپانيا باسشىسىنىڭ كومەكشىسى رەتىندە جۇمىسقا تۇرعان.
«مەنىڭ زەينەتكە شىققانىما 8 جىل بولدى. جاس ۇرپاققا بەرەتىن قۇندى تاجىريبەم بار. بۇل باعدارلاما زەينەتكەرلەر ءۇشىن وتە پايدالى. ەگەر ادامنىڭ ءبىلىمى، جۇمىس ىستەۋگە دەگەن قۇشتارلىعى بولسا، ول زاڭدى تۇردە جۇمىس ىستەي الۋى كەرەك. «التىن جاس» باعدارلاماسى ءبىز ءۇشىن ۇلكەن قولداۋ»، - دەدى ەربولات مۇستافين.
ەسكە سالايىق، بۇعان دەيىن الماتىدا جۇمىسقا ورنالاسۋعا كومەكتەسەتىن قانداي باعدارلامالار بار ەكەنىن جازعانبىز.
