الماتىدا اباي داڭعىلىنىڭ ءبىر بولىگى 25 كۇنگە جابىلدى
الماتى. KAZINFORM - الماتىدا اباي داڭعىلىن قالا شەكاراسىنا دەيىن ۇزارتۋ جۇمىستارىنا بايلانىستى كولىك قوزعالىسىنا ۋاقىتشا شەكتەۋ ەنگىزىلدى.
الماتى اكىمدىگىنىڭ مالىمەتىنشە، 2-25-قاراشا ارالىعىندا قيلىباي مەدەۋبەكوۆ كوشەسى مەن ۇزارتىلىپ جاتقان اباي داڭعىلىنىڭ قيىلىسىندا كولىك قوزعالىسى شەكتەلەدى
بۇل اۋماقتى وڭتۇستىك باعىتتا ۇ. قارامانوۆ، گرۋشوۆايا، سترويتەلنايا كوشەلەرى ارقىلى، ال سولتۇستىك باعىتتا سترويتەلنايا، ۆينوگرادنايا، ۇ. قارامانوۆ كوشەلەرى ارقىلى اينالىپ وتۋگە بولادى. اتالعان ۋچاسكەدە ەسكەرتۋ بەلگىلەرى قويىلادى.
ەسكە سالايىق، اباي داڭعىلىن قالا شەكاراسىنا دەيىن ۇزارتۋ جۇمىستارىن وسى جىلدىڭ سوڭىنا دەيىن اياقتاۋ جوسپارلانىپ وتىر. قازىر 600 مەترلىك سوڭعى ۋچاسكەدە جۇمىس قولعا الىنعان، ۇزارتىلعان جولدىڭ ۇزىندىعى 5,3 شاقىرىم.
وسىعان دەيىن ەربولات دوسايەۆ اباي داڭعىلىنىڭ قۇرىلىسى قاراشا ايىندا اياقتالاتىنىن ايتقان ەدى.
بۇدان بولەك، ول الماتىدا 72 جەر ۋچاسكەسى مەملەكەت قاجەتتىلىگىنە ءماجبۇرلى تۇردە الىناتىنىن ايتقان ەدى.
ايتا كەتەيىك، قوزعالىستى شەكتەۋگە قاتىستى بارلىق اقپارات Almaty.kz سايتىندا، @AlmatyJoly Telegram ارناسىندا، اۋدان اكىمدىكتەرى مەن باسقارمالاردىڭ الەۋمەتتىك جەلىلەرىندە، سونداي- اق 2GIS جانە «ياندەكس كارتالار» سەرۆيستەرىندە كورسەتىلگەن.
