الماتىدا 3 ادام كوز جۇمعان اۆتوبۋس اپاتى: جۇرگىزۋشىنى ۇرعان ادامعا سوت ۇكىمى شىقتى

الماتىدا ءۇش ادامنىڭ ولىمىنە اكەپ سوققان اۆتوبۋس اپاتىنا قاتىستى سوت ۇكىمى شىقتى. اۆتوبۋس جۇرگىزۋشىسىن ۇرعان كۇدىكتى سوتتالدى، - دەپ حابارلايدى Massaget.kz ءتىلشىسى.

كۇدىكتى دارحان احمەدجانوۆ ق ر قىلمىستىق كودەكسىنىڭ 293-بابى 1-بولىگىمەن، 351-بابى 3-بولىگىمەن كىنالى دەپ تانىلدى.

«وعان ق ر قىلمىستىق كودەكسىنىڭ 293-بابى 1-بولىگىمەن 1 جىل مەرزىمگە باس بوستاندىعىنان ايىرۋ تۇرىندەگى جازا تاعايىندالسىن. ق ر قىلمىستىق كودەكسىنىڭ 351-بابى 3-بولىگىمەن 8 جىلعا باس بوستاندىعىنان ايىرۋ تۇرىندەگى جازا تاعايىندالسىن. ق ر قىلمىستىق كودەكسىنىڭ 58-بابى 2-بولىگىنە سايكەس دارحان احمەدجانوۆقا تۇپكىلىكتى 8 جىل باس بوستاندىعىنان ايىرۋ تۇرىندەگى جازا تاعايىندالسىن. جازانى وتەۋ قىلمىستىق اتقارۋ جۇيەسىنىڭ قاۋىپسىزدىگى بارىنشا تومەن مەكەمەسىندە تاعايىندالسىن»، - دەدى سۋديا.

ال جابىرلەنۋشىلەردىڭ تالاپ-ارىزدارى ءىشىنارا قاناعاتتاندىرىلدى. جابىرلەنۋشى قۇسايىنوۆانىڭ پايداسىنا 6 ميلليون 397 مىڭ تەڭگە ماتەريالدىق شىعىن، 5 ميلليون تەڭگە مورالدىق شىعىن، جابىرلەنۋشى بايدۋاليەۆتىڭ پايداسىنا 10 ميلليون تەڭگە مورالدىق شىعىن وندىرىلەدى.

سوت جۇرگىزۋشى ەرمەك شوكەبايەۆانى جابىرلەنۋشى دەپ تانىدى. شوكەبايەۆا مەن «دۋمان ترانس» ج ش س- دەن مورالدىق وتەماقى ءوندىرۋ تۋرالى تالاپ قاناعاتتاندىرىلمادى.

ەسكە سالايىق، بۇعان دەيىن الماتىداعى اۆتوبۋس اپاتىنان ءۇش ادام مەرت بولعانى حابارلانعان ەدى. كەيىن قوعامدىق كولىك جۇرگىزۋشىسىن ۇرعان ەر ادام ۇستالعانى بەلگىلى بولدى. بۇل دەرەك ق ر قىلمىستىق كودەكسىنىڭ 345-بابى 3-بولىگى بويىنشا سوتالدى تەرگەۋدىڭ ءبىرىڭعاي تىزىلىمىنە تىركەلدى.

سونىمەن قاتار، قايعىلى وقيعادان قانشا ادام زاردەپ شەككەنى بەلگىلى بولدى. جول اپاتى قالاي بولعانى بەينەباقىلاۋ كامەراسىنا دا ءتۇسىپ قالعان.

«اشۋعا بوي الدىرىپ، ورەسكەل قاتە جىبەردىم. بۇزاقىلىق جاساعانىم ءۇشىن وتە قاتتى وكىنەمىن. الداعى ۋاقىتتا ءوزىم ءۇشىن ومىرلىك ساباق الدىم دەپ تۇسىنەمىن. ەندىگى بۇزاقىلىق جاسامايمىن دەپ وزىمە سەنەمىن جانە سىزدەردىڭ دە سەنۋلەرىڭىزدى سۇرايمىن»، - دەيدى ايىپتالۋشى.