الماتىدا 10 مىڭ ۆولت توق سوققان ەر ادام امان قالدى

الماتى. KAZINFORM - الماتىلىق كومبۋستيولوگتار جوعارى ۆولتتى توق سوققان 27 جاستاعى جىگىتتىڭ ءومىرى ءۇشىن ەكى اي كۇرەستى.

ەلەكتر مونتاجداۋشىسى ايان كوكتەمدە جۇمىس ۋچاسكەسىندە توققا ءتۇسىپ قالدى. ەر ادام العاشقى 10 كۇن جەتىسۋ وبلىسى الاكول ورتالىق اۋداندىق اۋرۋحاناسىنىڭ جانساقتاۋ بولىمىندە جاتتى. كەيىن جاعدايى تۇراقتالعان سوڭ ناۋقاس ءتيىستى دەڭگەيدە كومەك كورسەتە الاتىن كۇيىك ءبولىمى ماماندارى بار الماتىداعى №4 قالالىق كلينيكالىق اۋرۋحاناعا جەتكىزىلدى.

كومبۋستيولوگتار وعان ەكىنشى دارەجەلى ەلەكتر جاراقاتى، بىلەك، قول، ءىش، تاباننىڭ IV دارەجەلى كۇيىك دياگنوزىن قويدى.

«ناۋقاس تۋىستارى مەن رەانيماتولوگپەن №4 قالالىق كلينيكالىق اۋرۋحانانىڭ قابىلداۋ بولىمىنە جەتكىزىلدى. ونى كوپبەيىندى دارىگەرلەر بريگاداسى - تراۆماتولوگ، رەانيماتولوگ-انەستەزيولوگ، تەراپيەۆت - جان-جاقتى تەكسەرىپ، كۇيىك بولىمىنە جاتقىزۋ تۋرالى شەشىم قابىلدادى. ناۋقاستىڭ جاعدايى اۋىر بولدى»، - دەيدى ءبولىم مەڭگەرۋشىسى، دارىگەر-كومبۋستيولوگ ەلدوس المەنوۆ.

اۋرۋحانادا 53 كۇن جاتقان ناۋقاسقا 5 مارتە پلاستيكالىق وپەراتسيا جاسالدى.

«مەنى اجالدان امان الىپ قالعان الماتى ءتورتىنشى قالالىق اۋرۋحاناسىنىڭ دارىگەرلەرى مەن قىزمەتكەرلەرىنە راحمەت»، - دەدى ايان مەرەكەنوۆ.