الماتى پوليتسياسى قىتايدا پرانك تۇسىرگەن بلوگەرمەن پروفيلاكتيكالىق اڭگىمە جۇرگىزدى

الماتى. KAZINFORM - پوليتسيا قىزمەتكەرلەرى قىتايدان جاقىندا ورالعان قازاقستاندىقپەن پروفيلاكتيكالىق جانە ءتۇسىندىرۋ اڭگىمەسىن وتكىزدى.

الماتى قالاسى پوليتسيا دەپارتامەنتىنىڭ مالىمەتىنشە، بۇعان ونىڭ الەۋمەتتىك جەلىلەردە كەڭىنەن تارالعان بەينەروليكتەرى سەبەپ بولدى.

- ينتەرنەتتە تارالعان بەينەلەردىڭ بىرىندە ول سەرىگىنىڭ قالتاسىنان ۇيالى تەلەفوندى الىپ، ونى ءوتىپ بارا جاتقان قىتاي ازاماتتارىنا بەرەدى. سودان كەيىن تەلەفوندى ۇرلاپ كەتكەنىن ايتىپ، سول ادامعا نۇسقايدى. سونىمەن قاتار ول كوشەدە جانە مەترو ستانسيالارىندا بەيتانىس ەر ادامدارعا جاقىنداپ، قولدارىنان نەمەسە اياقتارىنان ۇستاپ، اينالاسىنداعىلاردىڭ ۇرەيى مەن تۇسىنبەۋشىلىگىن تۋدىرعان، - دەپ حابارلادى دەپارتامەنتتەن.

الماتى پوليتسياسى اڭگىمە بارىسىندا بلوگەر قىز بولعان جاعدايعا وكىنەتىنىن ايتقان.

- مەنىڭ ۆيدەوم ەشكىمدى رەنجىتۋ ماقساتىندا تۇسىرىلمەگەن. بۇل ويلانباي جاريالانعان ماتەريال بولدى. بەينەجازبالارىم بىرەۋگە جاعىمسىز اسەر ەتسە، كەشىرىم سۇرايمىن. ەندى كونتەنتتى جاريالاۋ ماسەلەسىنە مۇقيات قارايمىن، - دەدى ول.

پوليتسيا الەۋمەتتىك جەلىلەردە ماتەريال جاريالاۋ كەزىندە وتانداستارعا دا، باسقا ەل ازاماتتارىنا دا قۇرمەتپەن قاراۋ ماڭىزدى ەكەنىن ەسكەرتتى.

- مۇنداي ارەكەتتەر ارانداتۋشىلىق رەتىندە قابىلدانىپ، قوعامدا تەرىس رەاكسيا تۋعىزۋى مۇمكىن، - دەدى پوليتسيا وكىلدەرى.

ەسكە سالايىق، بۇعان دەيىن قازاقستاندىق بلوگەر ارۋجان ايبەكوۆانىڭ قىتايدىڭ گۋاڭجوۋ قالاسىندا جانە باسقا دا ايماقتارىندا تۇسىرگەن ءبىرقاتار «پرانك تەست» ۆيدەوسى جەرگىلىكتى جەردە سىنعا ۇشىراعانىن جازعانبىز.