الماتى پوليتسياسى كۇشەيتىلگەن جۇمىس رەجيمىنە كوشتى

الماتى. KAZINFORM — الماتى پوليتسياسى قالاداعى ءتارتىپتى قامتاماسىز ەتۋ بويىنشا شارالار قابىلدادى. جاڭا جىل مەرەكەسىنە بايلانىستى ءتارتىپ ساقشىلارى كۇشەيتىلگەن رەجيمدە جۇمىس ىستەيدى.

الماتى قالالىق پوليتسيا دەپارتامەنتىنىڭ مالىمەتىنشە، جاڭا جىلدى مەرەكەلەۋ كەزىندە قوعامدىق ءتارتىپتى قامتاماسىز ەتۋ، قىلمىستاردىڭ، سونداي-اق باسقا دا زاڭسىز ارەكەتتەردىڭ دەر كەزىندە الدىن الۋ جانە جولىن كەسۋ ماقساتىندا الماتى پوليتسياسى قىزمەتتىڭ كۇشەيتىلگەن نۇسقاسىنا كوشىرىلدى. 3 مىڭنان استام پوليتسەي قالاداعى ءتارتىپتى تاۋلىك بويى كۇزەتەدى.

پاترۋلدىك ەكيپاجداردىڭ سانى ۇلعايتىلدى، قىزمەت كورسەتۋ مارشرۋتتارى كۇشەيتىلدى، جاياۋ پاترۋلدىك قىزمەتكە ۇلتتىق ۇلاننىڭ 300 اسكەرى تارتىلدى.

— ازاماتتار كوپ جينالاتىن ورىندار مەن مادەني-ويىن-ساۋىق شارالارى وتەتىن ورىندار ەرەكشە باقىلاۋدا، — دەپ حابارلادى ۆەدومستۆودان.

الماتى تۇرعىندارى جاڭا جىل مەرەكەسىن تويلاۋدى باستاپ كەتتى. قالادا ءتۇرلى كونتسەرتتەر مەن ءىس- شارالار، سونداي-اق نەگىزگى جاڭا جىلدىق جارمەڭكە ءوتىپ جاتىر.

ەسكە سالايىق، 20-جەلتوقسان كۇنى الماتىدا باس شىرشانىڭ شامدارى جاعىلدى.

سونداي-اق جاڭا جىل ءتۇنى مەرەكەلىك وتشاشۋ بولادى. 31-جەلتوقساننان 1-قاڭتارعا قاراعان ءتۇنى مەگاپوليس تۇرعىندارى مەن قوناقتارى مەرەكەلىك وتشاشۋدى تاماشالاي الادى. وتشاشۋ دەمەۋشىلەر ەسەبىنەن ۇيىمداستىرىلادى.