الماتى وبلىسىندا ەكى جىل بۇرىن توي ۇستىندە اۆتوماتتان وق جاۋدىرعان ەر ادام ۇستالدى
قونايەۆ. KAZINFORM - الماتى وبلىسىندا ۇيلەنۋ تويى كەزىندە ەر ادام اۆتوماتتان وق جاۋدىرعان. الەۋمەتتىك جەلىگە شىققان ۆيدەودان ۇيلەنۋ تويى كەزىندە ەر ادامنىڭ ا ك-74 اۆتوماتىنان بىرنەشە رەت وق اتقانىن كورۋگە بولادى.
جازبادا وقيعانىڭ قاسكەلەڭ قالاسىندا بولعانى جازىلعان.
الماتى وبلىسى پوليتسيا دەپارتامەنتىنىڭ باسپا ءسوز قىزمەتى كۇدىكتىنىڭ ۇستالعانىن حابارلادى.
وقيعا 2022 -جىلدىڭ جازىندا قاراساي اۋدانى مەيرامحاناسىنىڭ اۋماعىندا بولعان.
- قازىرگى ۋاقىتتا 27 جاستاعى جەرگىلىكتى تۇرعىن ۇستالىپ، قاماۋعا الىندى. ودان ا ك-74 اۆتوماتى تابىلىپ، تاركىلەندى. كۇدىكتى شىنىمەن دە تانىسىنىڭ ۇيلەنۋ تويىندا بىرنەشە رەت وق اتقان، - دەپ حابارلادى الماتى وبلىسى پوليتسيا دەپارتامەنتىنىڭ باسپا ءسوز قىزمەتى.
بۇزاقىلىق فاكتىسى بويىنشا قىلمىستىق ءىس قوزعالدى.
تاركىلەنگەن قارۋ بالليستيكالىق ساراپتاماعا جىبەرىلدى.
ەسكە سالساق، بيىل قىستا الماتىداعى كوكونىس دۇكەنىنە كىرگەن ەر ادام قارۋدان وق اتقان بولاتىن.
