الماتى وبلىسىندا 9-سىنىپ وقۋشىسى ورتەنىپ جاتقان ۇيدەن ەكى ادامدى امان الىپ شىقتى
قونايەۆ. KAZINFORM - الماتى وبلىسىندا 9-سىنىپ وقۋشىسى ورتەنىپ جاتقان ۇيدەن زەينەتكەر مەن ونىڭ نەمەرەسىن الىپ شىقتى.
ءوڭىر اكىمدىگىنىڭ مالىمەتىنشە، 4-ماۋسىم كۇنى بورالداي كەنتى، №39-گيمنازيانىڭ 9-سىنىپ وقۋشىسى قاميتبەك يحسان، اتالعان اۋىلدىڭ نايزاشوقى كوشەسىندە تۇراتىن دوسىنىڭ ۇيىنە كەلە جاتىپ، نايزاشوقى كوشەسى، №11-ءۇيدىڭ ورتەنىپ جاتقانىن كورەدى.
«يحسان، ويلانباستان ءورت شىققان ۇيگە كىرىپ، ءورت كۇشەيمەي تۇرعاندا 63 جاستاعى زەينەتكەر مەن ونىڭ 12 جاستاعى نەمەرەسىن سىرتقا الىپ شىقتى. كەيىن وقيعا ورنىنا ءورت سوندىرۋشىلەردى شاقىرعان. بالانىڭ بۇل ەرلىگى ەشتەڭەمەن ولشەنبەيدى، وسىنداي ۇلدى تاربيەلەگەن اتا-اناسىنا جانە ۇستازدارىنا مىڭ العىس. يحسان - بۇگىنگى كۇننىڭ باتىرى»، - دەپ اتاپ ءوتتى اكىمدىكتەن.
ەسكە سالايىق، بىلتىر قاراشا ايىندا وتەگەن باتىر اۋىلىنداعى №24-ليتسەيدىڭ 8-سىنىپ وقۋشىسى گەروي اقجول № 219-اۆتوبۋستى توقتاتىپ، جولاۋشىلاردى امان الىپ قالعان بولاتىن.
اۆتور
الما مۇقانوۆا
