الماتى وبلىسىندا 30 ءۇيدىڭ اۋلاسى سۋ استىندا قالدى
قونايەۆ. KAZINFORM - الماتى وبلىسىندا توتەنشە جاعدايعا بايلانىستى جەدەل شتاب قۇرىلدى.
بۇگىن ساعات 08:25 شاماسىندا ۇزىناعاش اۋىلىندا سۇزگى القاپتارىنىڭ قورعانىس بوگەتى بۇزىلعان. ناتيجەسىندە 30 تۇرعىن ءۇيدىڭ اۋلاسى سۋ استىندا قالدى.
وبلىس اكىمدىگىنىڭ مالىمەتىنشە، وقيعا ورنىنا الماتى وبلىسى اكىمىنىڭ ورىنباسارى اسەت ماسابايەۆ پەن وبلىستىق توتەنشە جاعدايلار دەپارتامەنتىنىڭ باستىعى اتتانعان.
- قوسىمشا سۋ باسۋ قاۋپىنىڭ الدىن الۋ جانە سالدارىن بارىنشا ازايتۋ ماقساتىندا قورعانىس بوگەتتەرىن نىعايتۋ، سونداي-اق اعىندى سۋلاردى تۇرعىن ۇيلەردەن بۇرۋ جۇمىستارى جۇرگىزىلىپ جاتىر. توتەنشە جاعدايدىڭ سالدارىن جويۋ ءۇشىن 5 ارنايى تەحنيكا جۇمىلدىرىلىپ، قوسىمشا تاعى 5 تەحنيكا شاقىرىلدى. جۇمىسقا 15 مامان قاتىسىپ جاتىر، - دەپ حابارلادى اكىمدىكتەن.
ەسكە سالايىق، بۇعان دەيىن الماتى وبلىسىندا سۋ باسۋ قاۋپى جوعارى 13 ۋچاسكە انىقتالعانىن جازعانبىز.
