الماتى تۇرعىنى ۆوكزالدا بومبا تۋرالى جالعان حابار بەرگەنى ءۇشىن 4 جىل ارقالادى
استانا. KAZINFORM - الماتى قالاسىنىڭ 44 جاستاعى تۇرعىنى تەمىرجول ۆوكزالدارىندا جارىلعىش زات قويىلعانى تۋرالى بىرنەشە جالعان حابار بەرگەنى ءۇشىن 4 جىلعا باس بوستاندىعىنان ايىرىلدى. باس كولىك پروكۋراتۋراسى ءمالىم ەتتى.
ول جازاسىن وتەۋ بارىسىندا ءتورت رەت تاكسوفون ارقىلى قوڭىراۋ شالىپ، جارىلعىش زات قويىلعانى جايلى حابارلاعان.
- ونىڭ ارەكەتتەرى ەۆاكۋاتسيا مەن توتەنشە قىزمەتتەردىڭ جۇمىلدىرىلۋىنا سەبەپ بولدى. جالعان دابىلدىڭ سالدارىنان مەملەكەتتىك ورگاندارعا كەلتىرىلگەن شىعىن 3,3 ميلليون تەڭگەدەن استى. جۇرگىزىلگەن ساراپتامالار قوڭىراۋ شالعان ادامنىڭ جەكە باسىن جانە ونىڭ سوزدەرىندە تىكەلەي قاۋىپتىڭ بولعانىن راستادى، - دەلىنگەن حابارلامادا.
سوت ەر ادامدى قازاقستان رەسپۋبليكاسى قىلمىستىق كودەكسىنىڭ 273-بابى بويىنشا كىنالى دەپ تانىدى.
سوتتالۋشى مەملەكەتكە كەلتىرىلگەن شىعىندى وتەۋگە جانە وتەماقى تولەۋگە مىندەتتى.
كولىك پروكۋراتۋراسى مۇنداي قىلمىستار قوعامدىق قاۋىپسىزدىككە قاۋىپ ءتوندىرىپ، اۋىر سالدارعا اكەلەتىنىن ەسكەرتەدى.
ەسكە سالا كەتەيىك، بۇعان دەيىن وسكەمەندە «پوليسيا بولىمشەسىنە بومبا قويدىم» دەپ ازىلدەگەن ايەل ۇستالعان بولاتىن.
