الماتى تۇرعىنى قولدان جاسالعان شيە شارابىنان ءولىپ كەتە جازدادى

استانا. قازاقپارات - الماتىدا 33 جاستاعى ەر ادام شيە سۇيەگىن جەپ قويىپ، گيدروتسيان قىشقىلىمەن ۋلانىپ قالعان. سالدارىنان ول كوماعا ءتۇستى، - دەپ حابارلايدى Massaget.kz قوعامدىق دەنساۋلىق ساقتاۋ باسقارماسىنا سىلتەمە جاساپ.

تۋىستارى ەر ادامدى ەدەندە دارمەنسىز كۇيدە جاتقان جەرىنەن تاپتى. ولار جەدەل جاردەم شاقىرىپ، ناۋقاس دەرەۋ №7- قالالىق كلينيكالىق اۋرۋحاناعا جەتكىزىلدى. دارىگەرلەر تەز ارەكەت ەتۋگە ءماجبۇر بولدى، ويتكەنى ناۋقاس 1-2-دارەجەلى كوما جاعدايىندا بولدى.

ەر ادام جانساقتاۋ بولىمىنە جاتقىزىلدى. دارىگەرلەر ۋاقىتىلى ينتەنسيۆتى تەراپيانى باستاعان. كۇنى بويى ماماندار ونىڭ جاعدايىن مۇقيات باقىلاپ، ۋلانۋ سەبەبىن انىقتاۋ ءۇشىن سىناقتار جۇرگىزدى.

«توكسيكولوگيانىڭ ناتيجەلەرى كەلدى: ەسىرتكى زاتتارى تابىلعان جوق. تاڭەرتەڭ ناۋقاس ەسىن جيىپ، سۇراقتارعا جاۋاپ بەردى»، - دەدى رەانيماتولوگ كلارا جارماعامبەتوۆا.

دارىگەرلەرمەن اڭگىمەلەسۋ بارىسىندا ەر ادام وسى وقيعانىڭ الدىندا ىشىندە سۇيەگى بار ءبىر ستاقان شيە شارابىن ىشكەنىن ايتتى. شيە سۇيەگىندە اميگدالين گليكوزيدى بار، ول اسقازان ءسولىنىڭ اسەرىنەن گيدروتسيان قىشقىلىن، ياعني ەڭ كۇشتى ۋ بولەدى.

«تۇنبادا نەمەسە ءۇي شارابىندا گيدروتسيان قىشقىلى كوپ مولشەردە بولۋى مۇمكىن، سوندىقتان شيە سۇيەگىن جۇتىپ قويماۋعا كەڭەس بەرەمىز»، - دەپ ەسكەرتتى دارىگەر.

ستاتيستيكاعا سايكەس گيدروتسيان قىشقىلىنان ۋلانۋ سالدارىنان 78 پايىز جاعدايدا ادامدار ءولىم قۇشادى. الايدا بۇل جاعدايدا ەر ادامنىڭ جولى بولىپ، تۋىستارى ۋاقىتىندا تاۋىپ، قاجەت مەديتسينالىق كومەك الدى.