الماتى ماڭىنداعى ەكى مىڭداي ەسەك قىتايعا ەكسپورتتالدى ما
الماتى. KAZINFORM - الماتى وبلىسىندا قىتايعا تىرىدەي ەكسپورتتاۋ ماقساتىندا 1700 دەن استام ەسەك اسىراتايتىن قوجالىق قۇرىلعان بولاتىن.
الايدا شارۋانىڭ ايتۋىنشا، ولاردى ساتا الماعان.
- ءۇي جانۋرالارى ەندى فەرمادا جوق. وكىنىشكە قاراي، ءبىز ولاردى ەكسپورتتاي المادىق، ساتىلمادى. ءبىز ولاردى تەگىن بەرە سالدىق، - دەپ جاۋاپ بەردى kazinform اگەنتتىگىنىڭ تىلشىسىنە ەسەك وسىرۋمەن اينالىسقان فەرما يەسى ماكسيم پوجيگايلوۆ.
كاسىپكەر كوممەرتسيالىق قۇپيانى العا تارتىپ، مالدى كىمگە بەرە سالعاندارىن ايتپادى.
ەسكە سالايىق، بىلتىر الەۋمەتتىك جەلىدە فەرماداعى ەسەك ەتى قالا مەن جاقىن ماڭداعى ءدامحانالارعا ساتىلاتىنى تۋرالى اقپارات تاراعان ەدى.
كەيىن شارۋاشىلىق قانداي ماقساتتا، قاشان اشىلعانىن انىقتاۋ ءۇشىن Kazinform ءتىلشىسى مەگاپوليس ماڭىندا ورنالاسقان فەرماعا بارىپ قايتتى.
الماتى وبلىسى جامبىل اۋدانى اكىمدىگىنىڭ مالىمەتىنە سايكەس، شارۋا قوجالىعىندا العاشقى كەزدە مالعا ازىق بولاتىن داقىلداردى ءوسىرۋ جوسپارلانعان. بۇل مالىمەتتى «كازاگروماكس» قوجالىعىنىڭ يەسى ماكسيم پوجيگايلوۆ تا راستادى.
ونىڭ ايتۋىنشا، كاسىپكەر 1400 گ ا جەردى 2024 -جىلدىڭ اقپان ايىندا شەتەلدىك ينۆەستورلاردىڭ كومەگىمەن ساتىپ العان.
سونداي-اق فەرما يەسى شارۋا قوجالىعىندا اگرارلىق ىسپەن قاتار تۇياقتى جانۋارلاردى باعىپ، ولاردى تىرىدەي شەتەلگە ەكسپورتتاۋ جوسپارلانعانىن ايتتى. جەم- ءشوپ ەگىلگەن ەگىستىڭ ەسەبىنەن الىنباق بولعان.
- ەگىستىكپەن قاتار، قىتايعا جانۋارلاردى تىرىدەي ەكسپورتتاۋ جوسپارلاندى. سەبەبى، ءبىزدىڭ سەرىكتەسىمىزدىڭ قۇلجا قالاسىندا فەرماسى بار. ول ءسۇت ساۋۋمەن اينالىسادى. بۇل ءسۇت ونكولوگيالىق اۋرۋحانالارعا جىبەرىلەدى. سەبەبى، ەسەك سۇتىندە كازەين اقۋىزى كوپ، ول وكپە مەن باۋىردى ەمدەۋگە كومەكتەسەدى. ءبىراق بۇل ءبىزدىڭ ەلىمىز ءۇشىن جارامايدى. سوندىقتان تەك ەكسپورت جاساۋ جوسپارلاندى، ياعني شاعىن ەكونوميكالىق ورتا قالىپتاستىرعىمىز كەلدى. وسىندا داقىلداردى ەگەمىز. ونى مالعا بەرىپ، كەيىن ەكسپورتقا جىبەرەمىز، - دەگەن ەدى ماكسيم پوجيگايلوۆ.
ەندى كاسىپكەر اۋىلشارۋاشىلىق ءىسىن جالعاستىرۋدى جوسپارلاپ وتىر.
