الماتى حوستەلىندەگى ورتكە «حالىق بانكتىڭ» قاتىسى بار ما - باس پروكۋروردىڭ ورىنباسارى جاۋاپ بەردى

ءماجىلىستىڭ جالپى وتىرىسىنان كەيىن ب ا ق وكىلدەرىنە باس پروكۋروردىڭ ورىنباسارى جاندوس ومىراليەۆ الماتى حوستەلىندەگى ورتكە «حالىق بانكتىڭ» قاتىسى تۋرالى پىكىر ءبىلدىردى، دەپ حابارلايدى Kazinform.

«ارينە تەرگەۋ بارىسىندا مۇنىڭ ءبارى زەردەلەنەدى. قازىرگى ءبىرىنشى تاراپ جاتقان اقپارات بويىنشا، «حالىق بانكتىڭ» قاسىنداعى ءبىر فيليالىنىڭ عيماراتى دەگەن مالىمەت ايتىلىپ جاتىر. ياعني، ول ودان ءارى جالعا بەرگەن. جالعا العان - «ALA Hostel» دەگەن جاۋاپكەرشىلىگى شەكتەلگەن سەرىكتەستىك. ارينە، ءبىرىنشى كەزەكتە بۇل حوستەلدى وسىنداي جالعا الۋ تالاپتارىن ساقتاماي وتىرىپ قولدانعان ج ش س باسشىلارىنىڭ جاۋاپكەرشىلىگى قاراستىرىلۋى ءتيىس. كىناسىزدىك پرەزۋمپتسياسى دەيدى عوي. مەن الدىن الا ەش نارسە ايتپاي-اق قويايىن، ءبىراق تەرگەۋ بارىسىندا وسى ءورتتىڭ نە سەبەپتى شىققانى تۋرالى جانە ونىڭ سالدارى تىكەلەي عيماراتتىڭ باسشىلارىنا نەمەسە ونى جالعا بەرگەن كومپانيانىڭ باسشىلارىنا قاتىستىلىعى انىقتالسا، ەشكىم زاڭنان قۇتىلا المايدى»، - دەدى ول.

باس پروكۋروردىڭ ورىنباسارى تەرگەۋ كەزىندە قازىر ايتىلىپ جاتقان اقپاراتتاردىڭ ءبارى تولىق تەكسەرىلەتىنىن اتاپ ءوتتى.

«ءبىراق مۇنىڭ بارىنە قازىر «مىناۋ كىنالى» دەپ ايتۋعا ءالى ەرتەرەك. سىزدەر ب ا ق رەتىندە سۇراعان سوڭ ايتۋىم كەرەك. ونى جاريالاۋعا ءالى ەرتەرەك. ناقتى قىلمىستىق ءىس بويىنشا ايىپ تاعىلعان جوق. سول سەبەپتى كىشكەنە كۇتۋ كەرەك. ءبىراق وسى باعىتتا جۇمىس اتقارىلاتىنىنا مەن سىزدەردى سەندىرگىم كەلەدى»، - دەدى باس پروكۋروردىڭ ورىنباسارى جاندوس ومىراليەۆ.