الماتى اسپانىندا ءبىرتۇرلى دىبىس قايدان شىقتى
الماتى. KAZINFORM - الماتىنىڭ بىرنەشە اۋدانىندا تاڭعى ۋاقىتتا ءبىرتۇرلى دىبىس ەستىلدى. دىبىس جىلۋ ەلەكتر ستانساسىنان شىققانى بەلگىلى بولدى.
جەلى قولدانۋشىلارى ءبىرتۇرلى دىبىس شىعىپ جاتقانى جايلى ۆيدەونى الەۋمەتتىك جەلىگە جۇكتەدى.
«تاڭعى 4:44 كەزىندە بەس مينۋت بويى الماتى اسپانىندا شۋ ەستىلىپ تۇردى» دەلىنگەن جازبادا.
جەلى قولدانۋشىلارى دىبىستىڭ قالانىڭ ءار ايماعىنان ەستىلگەنىن ايتتى.
الماتى اكىمدىگى جىلۋ ەلەكتر ورتالىعىنىڭ جۇمىسىنا بايلانىستى دىبىس شىققانىن حابارلادى.
«الماتى ەلەكتر ستانسالارى» ا ق باسپا ءسوز قىزمەتىنىڭ مالىمەتىنشە، 9-اقپان تاڭعى ساعات 4:40 تا تەحنولوگيالىق قورعانىس جۇيەسى ىسكە قوسىلدى. سول سەبەپتى جاقىن اۋدانداعى ۇيلەردىڭ تۇرعىندارىنا شۋ ەستىلدى. قازاندىقتىڭ اۆتوماتتى قورعانىسى جۇمىسى ىستەگەن كەزدە بۇل قالىپتى جاعداي سانالادى» دەپ حابارلادى اكىمدىكتىڭ باسپا ءسوز قىزمەتى.
سونداي- اق دىبىس سالدارىنان تۇتىنۋشىلاردى جىلۋمەن قامتۋدا ەشقانداي كەدەرگى بولماعانى ايتىلادى.
اۆتور
دۋمان ارعىنگەلدى
