الماتى اۋەجايىنداعى وقيعا: كۇدىكتى تۋرالى نە بەلگىلى؟

استانا. KAZINFORM - كولىكتەگى پوليتسيا دەپارتامەنتى بۇگىن الماتى اۋەجايىندا بولعان وقيعاعا پىكىر ءبىلدىردى.

دەپارتامەنتتىڭ باسپا ءسوز قىزمەتى مالىمەتىنشە، 7-ناۋرىزدا الماتى اۋەجايىندا تەكسەرۋ ايماعىنا ءوتىپ، ينسپەكتوردىڭ شاشىنان ۇستاپ، اس ءۇي پىشاعىمەن قورقىتقان ەر ادام ۇستالعان.

«ول پوليتسيا بولىمىنە جەتكىزىلدى. وسى دەرەك بويىنشا قىلمىستىق ءىس قوزعالدى. كۇدىكتى ۋاقىتشا ۇستاۋ يزولياتورىنا قامالدى. تەرگەۋ جۇرگىزىلىپ جاتىر»، - دەپ جازىلعان حابارلامادا.

سونداي-اق، شابۋىلداعان ادام 67 جاستا ەكەنى ايتىلدى.

توسىن وقيعا تۋرالى نە بەلگىلى؟

7-ناۋرىزدا الماتى اۋەجايىندا قولىندا سۋىق قارۋى بار ەر ادام قىزمەتكەردى كەپىلگە الدى. جەلىدە اۋەجايدا تۇسىرىلگەن ۆيدەو تارادى. كادرلاردان قولىندا پىشاعى بار ەر ادام قىزدىڭ شاشىنان ۇستاپ العانىن بايقاۋعا بولادى. وقيعا ىشكى تەرمينالدا بولعان.

اۋەجايدىڭ باسپا ءسوز قىزمەتى مالىمەتىنشە، ەر ادام ءوزىن جولاۋشى رەتىندە كورسەتىپ، رەيس الدىنداعى قاۋىپسىزدىك ايماعىنا جاقىنداعان. قىزمەتكەرلەر ودان قۇجاتىن سۇراعان كەزدە ول قىزمەتكەردى پىشاقپەن قورقىتقان. 7 مينۋتتان كەيىن شابۋىلداۋشىنى پوليتسيا مەن اۆياتسيالىق قاۋىپسىزدىك قىزمەتكەرلەرى ۇستادى. ول قاماۋعا الىندى.

ارتىنشا پرەزيدەنت الماتى اۋەجايىنداعى وقيعاعا قاتىستى باتىل ازاماتتى ماراپاتتاۋدى تاپسىردى.