الماتى اۋەجايىندا رەيستەر كەستەسى نەلىكتەن قىتايشا جازىلا باستادى؟

استانا. KAZINFORM – جەلىدە الماتى اۋەجايىنداعى قىتايشا جازىلعان رەيستەر كەستەسى قىزۋ تالقىلاندى. الەۋمەتتىك جەلى قولدانۋشىلارى بۇل شەشىمگە تۇسىنبەۋشىلىك تانىتىپ جاتىر. الماتى اۋەجايى نە دەيدى؟

تابلو
сурет: Диас Нұрақынның парақшасынан

تولىعىراق Massaget.kz ماتەريالىندا.

كەيبىر جولاۋشىلار ىشكى رەيستەرگە قىتاي ءتىلىن قوسۋ ورىنسىز دەپ سانادى.

الماتى حالىقارالىق اۋەجايى ىشكى رەيستەر تەرمينالىنداعى اقپاراتتىق تابلولاردا قىتاي تىلىندە اقپارات بەرىلە باستاعانىن راستادى جانە بيىل قازاقستاندا قىتاي حالىق رەسپۋبليكاسىنىڭ تۋريزم جىلى ەكەنىن مالىمدەدى.

«الماتى حالىقارالىق اۋەجايى 2025-جىل قازاقستان رەسپۋبليكاسىندا ەكى مەملەكەت اراسىنداعى دوستىق قارىم-قاتىناستى ودان ءارى نىعايتۋ ءۇشىن قىتاي حالىق رەسپۋبليكاسىنىڭ تۋريزم جىلى بولىپ جاريالانۋىنا بايلانىستى اۋەجايداعى T1 ىشكى رەيستەر تەرمينالىنداعى اقپاراتتىق تابلولاردا قىتاي تىلىندە اقپارات كورسەتىلەتىنىن حابارلايدى»، - دەپ جاۋاپ بەردى الماتى حالىقارالىق اۋەجايىنىڭ كورپوراتيۆتىك كوممۋنيكاتسيالار دەپارتامەنتى Massaget.kz سۇراۋىنا.

دەپارتامەنت سونداي-اق بۇل شەشىم قازاقستان اۋماعى ارقىلى ءجيى جۇرەتىن قىتايدان ترانزيتتىك جولاۋشىلاردىڭ ايتارلىقتاي اعىنىنا بايلانىستى تۋىنداعانىن ايتتى.

«الماتى اۋەجايى - حالىقارالىق اۋەجاي جانە كوپتەگەن قىتاي ازاماتتارىنا قىزمەت كورسەتەدى، قىتاي تىلىندەگى اقپارات جولاۋشىلارعا قىزمەت كورسەتۋ ساپاسىن جاقسارتۋعا جانە اۋەجايدا ءجۇرىپ-تۇرۋ كەزىندە ىڭعايلىلىقتى قامتاماسىز ەتۋگە باعىتتالعان»، - دەلىنگەن حابارلامادا.

قازىرگى ۋاقىتتا T1 تەرمينالىنىڭ اقپاراتتىق تابلوسىندا كەلەسى تىلدەر تىزبەگى قولدانىلادى:

قازاق ءتىلى؛

ورىس ءتىلى؛

اعىلشىن ءتىلى؛

قىتاي ءتىلى.

ءار تىلدەگى اقپارات ەكرانداردا 10 سەكۋند كورسەتىلەدى دە، سودان كەيىن ول اۆتوماتتى تۇردە كەلەسى تىلگە اۋىسادى.

ەسكە سالايىق، بۇعان دەيىن الماتى اۋەجايىنىڭ جاڭا تەرمينالىنىڭ توبەسىنەن سۋ اعىپ، جەلىدە كادرلار تارادى. وندا ساۋدا بۋتيگى توبەسىنەن سۋ اعىپ جاتقانى كورسەتىلگەن. الماتى اۋەجايى تەرمينال توبەسىنەن سۋ اعۋعا قاتىستى بارلىق اقاۋ دەرەۋ تۇزەتىلگەنىن حابارلادى.

الايدا كوپ ۇزاماي الماتى حالىقارالىق اۋەجايىنىڭ جاڭا تەرمينالىن سۋ باسقانى تۇسىرىلگەن تاعى دا ۆيدەولار تارادى. قاتتى لايلى جاۋىن-شاشىن سالدارىنان پەررون جاعىنداعى نوسەر كاناليزاتسياسى ءىشىنارا بىتەلىپ قالدى.

سوڭعى جاڭالىقتار