الماتى اۋەجايى 10 ميلليونىنشى جولاۋشىنى قارسى الدى
الماتى. KAZINFORM - الماتى حالىقارالىق اۋەجايى 10 ميلليونىنشى جولاۋشىنى قارسى الدى. بۇل الماتى اۋەجايى مەن قالا ءۇشىن تاريحي وقيعا.
ءساتتى ساننىڭ يەسى شىمكەنتتەن الماتىعا جول تارتقان 47 جاستاعى شولپان سادىقوۆا بولدى. وعان تاريحي وقيعانىنىڭ قۇرمەتىنە الماتى اۋەجايى گرۋزياعا ەكى ادامعا جولداما سىيلادى.
- مەن الماتى قالاسىنىڭ تۇرعىنىمىن، جاسىم 47 دە. اتا-انامدى سارىاعاشقا دەمالۋعا اپارىپ، قايتىپ كەلە جاتقان ەدىم. كۇتپەگەن جەردەن وسىنداي توسىن سىيعا يە بولىپ وتىرمىن. ەندى گرۋزياعا اناممەن بىرگە بارسام دەيمىن، - دەدى جولاۋشى.
ال الماتى اۋەجايىنىڭ پرەزيدەنتى گوكەر كوسە بيىل اۋەجاي 11 ميلليونىنشى جولاۋشىنى قارسى الۋى مۇمكىن ەكەنىن اتاپ ءوتتى.
- بۇگىن ءبىز اۋەجاي مەن قالا تاريحىندا العاش رەت 10 ميلليونىنشى جولاۋشىنى قابىلدادىق. بۇل جولاۋشى اۆتوماتتى جۇيە ارقىلى انىقتالدى جانە بۇل شىمكەنت قالاسىنان كەلە جاتقان ازامات. جالپى الماتى حالىقارالىق اۋەجايىندا جولاۋشىلار اعىنى ءوسىپ كەلەدى. وعان سالىنعان ينۆەستيتسيالار مەن جاڭا تەرمينالدىڭ اشىلۋى اسەر ەتۋدە. بيىل جولاۋشىلار سانى 11 ميلليونعا جەتەدى دەپ ويلايمىز. اۋەجايدا 20 ميلليونىنشى جولاۋشى قابىلدايتىن كۇننىڭ اۋىلى دا الىس ەمەس، - دەدى الماتى اۋەجايىنىڭ پرەزيدەنتى گوكەر كوسە.
الماتى اۋەجايىنىڭ مالىمەتىنە سايكەس، سوڭعى ءۇش جىلدا اۋە باعىتتاردىڭ سانى ەكى ەسە جانە الماتىعا ۇشاتىن اۋەكومپانيالار سانى 24 تەن 37 گە دەيىن وسكەن. 2024-جىلدىڭ توعىز ايىندا جولاۋشىلار اعىنى 8,5 ميلليون ادامعا جەتتى. ال جاڭا حالىقارالىق جولاۋشىلار تەرمينالىنىڭ ىسكە قوسىلۋىمەن اۋەجايدىڭ وتكىزۋ قابىلەتى 14 ميلليون جولاۋشىعا دەيىن كوبەيدى.
ەسكە سالايىق، بۇعان دەيىن بيىل 1-ماۋسىم كۇنى الماتى حالىقارالىق اۋەجايىنىڭ جاڭا تەرمينالى العاشقى رەيستەردى قابىلدادى.
كەيىن الماتى اۋەجايىنىڭ پرەزيدەنتى گوكەر كوسە اۋەجايعا تاعى 100 ميلليون دوللار ينۆەستيتسيا سالىناتىنىن ايتتى.
وتكەن اپتادا الماتى اۋەجايىنىڭ ەسكى جانە جاڭا تەرمينالى اراسىندا كوپىر اشىلدى.
