الماتى-3 ۆوكزالىنىڭ العاشقى جوباسى قاشان دايىن بولادى

الماتى. قازاقپارات - 2023 -جىلى الماتى قالاسىنىڭ باس جوسپارى بەكىتىلدى. وندا جاڭا تەمىرجول ۆوكزالى - الماتى-3 ۆوكزالىنىڭ قۇرىلىسى قاراستىرىلعان. Kazinform ءتىلشىسى جاڭا نىسانعا بايلانىستى الماتى قالاسى قالالىق موبيلدىلىك باسقارماسىنا ساۋال جولداپ، ۆوكزال قۇرىلىسى قازىر قانداي ساتىدا ەكەنىن سۇرادى.

قالالىق موبيلدىلىك باسقارما باسشىسىنىڭ ورىنباسارى اسان بوستانوۆتىڭ ايتۋىنشا، قازىرگى ۋاقىتتا جاڭا ۆوكزالدىڭ تەحنيكالىق-ەكونوميكالىق نەگىزدەمەسى ازىرلەنىپ جاتىر.

- باسقارما «الماتى-3 تەمىرجول ۆوكزالىنىڭ قۇرىلىسى» تەحنيكالىق- ەكونوميكالىق نەگىزدەمەسىن ازىرلەۋ بويىنشا جۇمىستار جۇرگىزۋدە. شارتقا سايكەس جۇمىستاردىڭ اياقتالۋ مەرزىمى - 2025 -جىلدىڭ قاڭتار ايى. جوبانىڭ تەحنيكالىق جانە قارجىلىق پارامەترلەرى، ونىڭ ىشىندە ناقتى قۇنى، قارجىلاندىرۋ كوزى، ىسكە اسىرۋ مەرزىمى، مەملەكەتتىك قولداۋ شارالارى، ينۆەستيتسيالار كولەمى تەحنيكالىق- ەكونوميكالىق نەگىزدەمە ازىرلەنگەننەن كەيىن بەلگىلى بولادى، - دەدى ول.

باسقارما جاۋابىنا سايكەس، الماتى-3 تەمىرجول ۆوكزالىنىڭ قۇرىلىسى «مادەنيەت» شاعىن اۋدانىنىنداعى ارۋانا كوشەسىنىڭ باتىسىندا قاراستىرىلعان.

سونداي-اق اسان بوستانوۆ قازىرگى ۋاقىتتا الماتى 1-، 2- تەمىرجول ۆوكزالدارىن جانە وعان تيەسىلى اۋماقتى جوندەۋ مەن اباتتاندىرۋ جۇمىستارى الداعى ۋاقىتتا جوسپارلانباعانىن اتاپ ءوتتى.

ايتا كەتكەن ءجون، الماتى-1، الماتى-2 تەمىرجول ۆوكزالدارى جانە وعان تيەسىلى ايماق «ق ت ج» ا ق-نىڭ الماتى ماگيسترالدىق بولىمشەسىنەن 2019 -جىلدىڭ 26-ماۋسىمىندا الماتى قالاسىنىڭ مەملەكەتتىك اكتيۆتەر باسقارماسىنا بەرىلگەن بولاتىن. كەيىن قوس ۆوكزال الماتى قالاسى قالالىق موبيلدىلىك باسقارماسىنا بەكىتىلدى.

ەسكە سالايىق، بۇعان دەيىن تەمىرجول سالاسىنداعى تاريف جۇيەسى قايتا قارالۋى مۇمكىن ەكەنىن جازعانبىز.

اۆتور
دوسبول اتاجان