الماسبەك سادىربايدىڭ ۇستىنەن تاعى ءبىر قىلمىستىق ءىس قوزعالعان - قارجىلىق مونيتورينگ اگەنتتىگى
استانا. KAZINFORM - قارجىلىق مونيتورينگ اگەنتتىگى ءتوراعاسىنىڭ ورىنباسارى جەڭىس ەلەمەسوۆ سۋبسيديا سحەمالارى ارقىلى 1,2 ميلليارد تەڭگە جىمقىردى دەگەن كۇدىكپەن قاماۋعا الىنعان «شاڭىراق» قوعامدىق بىرلەستىگىنىڭ باسشىسى الماسبەك سادىربايدىڭ ءىسى نەگە ارنايى پروكۋرورلارعا وتكەنىن ءتۇسىندىردى.
ايتا كەتۋ كەرەك، اۋەلدە الماسبەك سادىربايدى قارجىلىق مونيتورينگ اگەنتتىگىنىڭ الماتى وبلىسىنداعى دەپارتامەنتى تۇتقىنداعان بولاتىن.
- بۇل ءىستى قازىر ارنايى پروكۋرورلار تەرگەپ جاتىر ەكەن. وعان نە سەبەپ بولدى، - دەپ سۇرادى جۋرناليست.
اگەنتتىك وكىلى مۇنى كۇدىكتىنىڭ ۇستىنەن باسقا دا قىلمىستىق ءىس قوزعالعانىمەن ءتۇسىندىردى.
- نەگىزى قاي ءىستى قاي ورگان تەرگەيتىنى تۋرالى شەشىمدى پروكۋراتۋرا قۇزىرلى ورگان رەتىندە قابىلدايدى. ولاردا سوعان قاتىستى (الماسبەك سادىربايعا - رەد. ) باسقا قىلمىستىق ىستەر بولعان. سول سەبەپتى ءبىزدىڭ قىلمىستىق ءىستى سولارعا قوستى. ۇكىمەتتىڭ ورگاندارى ءبىر ادامنىڭ ۇستىنەن جەكە-جەكە قىلمىستىق ءىستى تەرگەمەيدى عوي. سول سەبەپتەن ولاردىڭ ءبىر ورگاندا بولسىن دەپ، بىزدەگى ءىستى قىسقارتىپ، وزدەرى تەرگەپ جاتىر. بىزدە بولعان كەزدە قىلمىستىق كودەكستىڭ 189-باپ بولاتىن. ال پروكۋراتۋرا تاراپىنان قانداي باپ ەكەنىن بىلمەيمىن، - دەدى جەڭىس ەلەمەسوۆ.
