الماس وتەشوۆ ىشكىلىكتى قويعان سوڭ ءومىرى قالاي وزگەرگەنىن كورسەتتى
استانا. KAZINFORM - الەم چەمپيوناتىنىڭ جۇلدەگەرى، اۋىر اتلەت الماس وتەشوۆ ومىرىندەگى تۇبەگەيلى وزگەرىستەر تۋرالى اشىق مالىمدەمە جاسادى، دەپ حابارلايدى El.kz ينتەرنەت پورتالى.
ول الەۋمەتتىك جەلىدە ىشىمدىكپەن قوشتاسىپ، رۋحاني جاڭعىرۋ جولىنا تۇسكەنىن بايانداپ، بۇل جازباسىن جاستارعا وي سالۋ ءۇشىن جاريالاعانىن ايتتى.
بۇل سۋرەتتى جاريالاماس بۇرىن كوپ ويلاندىم. شىنىمەن دە بۇنىڭ قاجەتتىلىگى بار ما دەگەن ساۋال جانىمدى مازالادى. ءبىراق ءوزىم ءۇشىن ەمەس، وزگەلەرگە ساباق بولسىن دەپ ءبولىستىم، - دەپ جازدى سپورتشى.
الماس وتەشوۆ اۋىر ساتتەردە ىشكىلىككە بوي الدىرۋ - تىعىرىقتان شىعاتىن جول ەمەس ەكەنىن باسا ايتادى. ونىڭ ايتۋىنشا، جاڭا ومىرگە قادام باسۋى قۇران اتىمەن ىشىمدىكتەن باس تارتۋعا بەرگەن ۋادەسىنەن باستالعان.
نۇرسەيىت جىلقىشىبايدىڭ «ۋاقىت كورسەتەدى» YouTube ارناسىنا بەرگەن سۇحباتىمدا حالىق الدىندا قۇران ۇستاپ تۇرىپ، ەندى ەشقاشان اششى سۋعا جولامايمىن دەپ انت ەتتىم، - دەيدى الماس.
ول بۇل كۇرەستە ابايدىڭ «وزىڭە سەن، ءوزىڭدى الىپ شىعار، اقىلىڭ مەن قايراتىڭ ەكى جاقتاپ» دەگەن ۇلاعاتتى ءسوزىن باستى باعدار ەتكەنىن ايتىپ ءوتتى. وتەشوۆتىڭ ايتۋىنشا، ونى قۇتقارعان - اقىل مەن ەرىك-جىگەردىڭ كۇشى.
سونداي-اق سپورتشى ءوز جولىندا قولداۋ بىلدىرگەن جاندارعا ەرەكشە العىس ايتتى. اتاپ ايتقاندا، قىزىلوردا وبلىسىنىڭ اكىمى نۇرلىبەك نالىبايەۆقا، وبلىستىق سپورت باسقارماسىنىڭ باسشىسى باقتيار ارتايەۆقا، جانە داۋلەت تۇرلىحانوۆ، سادىق مۇستافايەۆ، يليا يلين سىندى ازاماتتارعا شەكسىز ريزاشىلىعىن ءبىلدىردى.
التى ايدىڭ ىشىندە ءومىرىم تۇبەگەيلى وزگەردى. بۇل - مەنىڭ ەكىنشى تىنىسىم، جاڭا ءومىرىمنىڭ باستاۋى، - دەپ تۇيىندەدى ءسوزىن الماس وتەشوۆ.
