الەم قۇمار ويىن قۇرساۋىنا شىرمالعان
قۇمار ويىندارىنا تاۋەلدىلىك الەمدە دە ارتىپ بارادى. جەر جۇزىندە 350 ميلليون ادام لۋدومانيادان زارداپ شەگىپ وتىر. دۇنيەجۇزىلىك دەنساۋلىق ساقتاۋ ۇيىمىنىڭ دەرەگى وسىنداي.
قۇمار ويىن اسىرەسە ا ق ش، گەرمانيا، كانادا جانە قىتايدا تابىستى بيزنەسكە اينالعان. بۇل ەلدەردە ميلليونداعان ادام وسى ءبىر ىندەتتىڭ شىرماۋىنان شىعا الماي ءجۇر. لۋدومانيا بويىنشا كوش باستاپ تۇرعان ەل – ا ق ش. تۇرعىنداردىڭ 85 پايىزى ومىرىندە كەمى ءبىر رەت قۇمار ويىن ويناعان. ال 40 پايىزى جىلىنا ءبىر مارتە ويىنحاناعا باس سۇعىپ تۇرادى ەكەن. مۇنان بولەك، سپورتتىق ويىندارعا ۇتىس تىگەتىندەر دە كوپ. ول اسىرەسە جاستار اراسىندا تانىمال. ماماندار ەلدە ويىنقۇمارلىق ادەتكە الكوگولدىك پەن ەسىرتكىگە تاۋەلدىلىك قوسىلىپ، پسيحيكالىق اۋرۋعا شالدىققاندار سانى ارتىپ بارادى دەيدى.
گەرمانيادا لۋدومانياعا شەكتەۋ جوق
گەرمانيادا لۋدومانياعا شالدىققان ميلليوننان اسا ادام بار. تاعى 3 ميلليون تۇرعىندا قۇمار ويىنعا تاۋەلدىلىكتىڭ العاشقى بەلگىلەرى بايقالعان. مۇنى سوڭعى زەرتتەۋلەر كورسەتكەن. ويتكەنى مۇندا ءتۇرلى ونلاين- پلاتفورمالار مەن ويىن اۆتوماتتارى جانە كازينو قولجەتىمدى. ويىنحانالاردىڭ جارناماسى جەر- جەردە ءىلۋلى تۇرادى. سوعان قاراماستان زاڭسىز جۇمىس ىستەيتىندەر كەزدەسەدى.
ميحاەل ريزە، الدىن الا كومەك كورسەتۋ ورتالىعىنىڭ قىزمەتكەرى:
"گەرمانيادا قۇمار ويىنداردى شەكتەۋ بويىنشا ءار ءوڭىردىڭ ەرەجەسى ءارتۇرلى. سوندىقتان ءار فەدەرالدىق اۋماقتىڭ باسشىلىعى ءوز بەتىنشە شەشىم قابىلدايدى. مىسالى، بەرليندە ويىنحانالار مەن بۋكمەكەرلىك كەڭسەلەر مەكتەپتەن كەمى 200 مەتر، ال ءبىر- بىرىنەن 500 مەتر قاشىقتىقتا ورنالاسۋى كەرەك. وسى تالاپقا ساي كەلمەگەندەرىنىڭ ءبىرازى جابىلدى. قۇمار ويناۋشىلار سانى دا ەداۋىر ازايدى. "
قىتاي زاڭسىز ويىنعا قارسى كۇرەستى كۇشەيتتى
قىتايدا قۇمار ويىندار - تابىستى بيزنەس ءتۇرى. نەگىزى بۇل ەلدە قۇمار ويىنعا تىيىم بار. تەك كازينو ورتالىعى سانالاتىن ماكاودا شەكتەۋ جوق. ءوز ەلىندە ويناي الماعان تۇرعىندار شەتەلدە ويىنحانا تابالدىرىعىن ءجيى توزدىرادى. سىرتقا شىعارىلعان زاڭسىز كاپيتالدىڭ بەستەن ءبىرى - قۇمار ويىننىڭ ۇلەسىنە تيەسىلى. سوندىقتان قىتاي بيلىگى زاڭسىز ونلاين- پلاتفورمالارمەن كۇرەستى كۇشەيتكەن.
جاپونيا جاستارى قۇمار ويىن قۇرىعىنا ىلىككەن
جاپونيا حالقى كوشە بۇرىشتارىنداعى ويىن اۆتوماتتارىنا اۋەستەنىپ العان. تۇرعىنداردىڭ 3,6 پايىزىندا قۇمار ويىنعا تاۋەلدىلىك بار. اسىرەسە 15 پەن 30 جاس ارالىعىنداعىلار لۋدومانياعا بايلانعان. بۇل وسكەلەڭ ۇرپاقتىڭ دەنساۋلىعىنا كەرى اسەر ەتىپ وتىر. كەي جاعدايدا ويىنعا تاۋەلدىلىك سوڭى قىلمىسقا اكەپ سوعىپ جاتادى.
ءاسيا نۇرلىبايەۆا
