الەم كۋبوگى: بەيجىڭدە جەرلەستەرىمىز ەكى مەدال جەڭىپ الدى

استانا. KAZINFORM - قىتاي استاناسى بەيجىڭدە كوركەم جۇزۋدەن الەم كۋبوگىنىڭ العاشقى كەزەڭى باستالدى. سپورتتى دامىتۋ ديرەكسياسىنىڭ باسپا ءسوز قىزمەتى ءمالىم ەتكەندەي، العاشقى جارىس كۇنى قازاقستاندىق سپورتشىلار 2 مەدال جەڭىپ الدى. ەلىمىزگە سۋ سپورتى تۇرلەرىنەن الەم چەمپيوناتىنىڭ العاشقى التىنىن سىيلاعان ەدۋارد كيم مەن نارگيزا بولاتوۆا جۇبى (ميكست دۋەت) بۇگىن تەحنيكالىق باعدارلامادا كۇمىس جۇلدەگەر اتاندى.

وسىدان كەيىن توپتىق سايىستا قازاقستان قۇراماسى تەحنيكالىق باعدارلامانىڭ قولا جۇلدەسىنە يە بولدى. كارينا ماگرۋپوۆا جەكەلەي سىندا (تەحنيكالىق باعدارلاما) 8-ساتىعا جايعاستى. ەندى ەرتەڭ ەركىن باعدارلاماداعى جارىستار بولادى.

ايتا كەتەيىك، بۇل كەزەڭدە 14 ەلدەن كەلگەن 85 سپورتشى سىنعا ءتۇسىپ جاتىر. ولار جارىس اياقتالعانعا دەيىن 11 مەدال جيىنتىعىن ساراپقا سالادى. وسىعان دەيىن قىتاي استاناسى سۋ سپورتى تۇرلەرىنەن 35 الەمدىك جارىستى قابىلداپتى.

جالپى بيىل الەم كۋبوگىنىڭ 4 كەزەڭى وتەدى. اتلەتتەر بەيجىڭنەن كەيىن پاريجگە (3-5 مامىر)، ماركحەمگە (31-مامىر - 2-ماۋسىم) ات باسىن تىرەپ، شىلدەدە بۋداپەشتە (5-7-شىلدەدە) سۋپەرفينالدا كىم مىقتىنى انىقتايدى.

اۆتور
كۇنسۇلتان وتارباي