اپەللياتسيا اناسىنا بەرگەن ەكى قىزدى جوعارعى سوت اكەسىنىڭ قامقورلىعىندا قالدىردى

استانا. KAZINFORM - جوعارعى سوتتا اجىراسقان ەرلى-زايىپتىلاردىڭ ەكى بالانى ءبولىسۋ داۋى قارالدى.

ەرلى-زايىپتىلار 8 جىل نەكەدە تۇرىپ، اجىراسقان. اجىراسۋ كەزىندە سوت ولاردىڭ كامەلەتكە تولماعان ەكى قىزىن (5 جانە 9 جاسار) اكەسىمەن بىرگە تۇرادى دەپ شەشتى.

اناسىنان اكەسىنىڭ پايداسىنا ولاردى اسىراپ-باعۋعا - ولار كامەلەتكە تولعانعا دەيىن اي سايىن جالاقىسىنىڭ جانە وزگە دە تابىسىنىڭ 1/3 بولىگى، ياعني اليمەنت ءوندىرىپ الىندى.

اپەللياتسيا بۇل شەشىمدى وزگەرتتى: بالالاردى اناسىنا قالدىرىپ، ونىڭ پايداسىنا اكەسىنەن اليمەنت ءوندىردى. قىزداردىڭ اكەسى بۇل شەشىمگە كاسساتسيادا قارسىلىق ءبىلدىردى.

جوعارعى سوتتىڭ ازاماتتىق ىستەر جونىندەگى سوت القاسى ءىستى زەردەلەدى.

ءبىرىنشى ساتىداعى سوت بالالاردىڭ اكەسىمەن تۇرعانى ءجون دەپ تاۋىپ، اناسىنىڭ اتا-انا مىندەتتەرىنەن ءوز بەتىنشە شەتتەتىلگەنىن اتاپ ءوتتى. بالالاردى اسىراۋ مەن تاربيەلەۋ اۋىرتپالىعىن ولاردىڭ اكەسى كوتەرگەن.

اپەللياتسيا اتا-انا مىندەتىنەن جالتارۋ كىناسىن راستايتىن قۇجاتتاردىڭ جوقتىعىن، سونداي-اق بالالاردىڭ جاسىن، جىنىسىن جانە ولاردىڭ انا قامقورلىعىنا مۇقتاجدىعىن ەسكەرە وتىرىپ، بالالاردىڭ اناسىمەن تۇرعانى ءجون دەپ تاپقان.

جوعارعى سوت 1989 -جىلعى ب ۇ ۇ-نىڭ بالا قۇقىقتارى تۋرالى كونۆەنتسياسى بالالارعا قاتىستى بۇكىل ءىس-قيمىلدا ءبىرىنشى كەزەكتە ولاردىڭ مۇددەسىن نەعۇرلىم جاقسى قامتاماسىز ەتۋگە نازار اۋدارۋدى مىندەتتەيتىنىن اتاپ ءوتىپ، اپەللياتسيا ۇستانىمىمەن كەلىسكەن جوق.

«جوعارعى سوت القاسى بالالاردىڭ اناسىمەن بىرگە تۇرۋى ولاردىڭ مۇددەسىنە قايشى كەلەتىنىن اتاپ ءوتتى. ايەلدىڭ سپيرتتىك ىشىمدىك ىشۋىنەن وتباسىندا جانجال بولادى، بالالارعا كۇتىم مەن قامقورلىق جاسالمايدى. بۇعان كۋاگەرلەردىڭ ايعاقتارى كۋا. ءبىرىنشى ساتىداعى سوت قىزداردىڭ تۋعاننان اكەسىمەن بىرگە تۇراتىنىن ەسكەردى، بۇل - ولار ءۇشىن ۇيرەنشىكتى جاعداي. سوت شەشىمى زاڭدى كۇشىنە ەنگەننەن كەيىن اناسى قىزدارىن وزىنە العان جوق، ولار ءالى كۇنگە دەيىن اكەسىمەن بىرگە تۇرادى» دەيدى جوعارعى سوتتان.

بۇل رەتتە اناسى ولارعا بارماعان، جالپى مەكتەپتىك ءىس-شارالارعا جانە اتا-انالار جينالىسىنا قاتىسپاعان، قىزداردىڭ ومىرىنە ارالاسۋعا قۇلشىنىس تانىتپاعان.

اكەسىنىڭ ۇيىندە بالالارعا سالاۋاتتى دامۋ ءۇشىن بارلىق جاعداي جاسالعان. قىزدارمەن قالىپتاسقان ءوزارا قارىم-قاتىناستىڭ سيپاتى ولاردىڭ اكەسىنە دەگەن سۇيىسپەنشىلىگىن ايعاقتايدى.

جوعارعى سوت بالالاردىڭ اكەسىمەن تۇرعانىن ءجون دەپ تاۋىپ، العاشقى اپەللياتسيالىق سوت اكتىسىنىڭ كۇشىن جويدى.