الاياقتىق، بوپسالاۋ: ەلىمىزدىڭ بىرنەشە وڭىرىندە جاستاردان قۇرىلعان قىلمىستىق توپتار ۇستالدى

استانا. KAZINFORM - ق ر ءى ءى م جاستار اراسىنداعى قىلمىستىق توپتاردى انىقتاۋ جانە جولىن كەسۋ بويىنشا جۇمىستى تۇراقتى نەگىزدە جۇرگىزىپ كەلەدى، - دەپ حابارلايدى Polisia.kz.

مۇنداي توپتار كوبىنەسە جاسىرىن قىلمىس جاسايدى، ياعني جابىرلەنۋشىلەردى قورقىتىپ، ۇركىتىپ، ويلاعان ماقساتتارىن جۇزەگە اسىرادى. «ۇرىلار» يدەولوگياسىن ۇستانىپ، زاڭسىزدىققا جول بەرەتىن توپتار قوعامدىق ءتارتىپ پەن ازاماتتاردىڭ قۇقىقتارىن ورەسكەل بۇزادى.

جاقىندا عانا ءىىم ۇيىمداسقان قىلمىسقا قارسى كۇرەس دەپارتامەنتى شىمكەنت جانە پاۆلودار قالالارىندا وسىنداي ەكى توپتىڭ ۇستالعانى تۋرالى حابارلاعان بولاتىن. كۇدىكتىلەر قاماۋعا الىنىپ، تەرگەۋ جۇرگىزىلىپ جاتىر.

- بيىل قاڭتار ايىندا باسقا دا ءبىرقاتار وڭىردە وسىنداي ۇستاۋ وپەراتسيالارى جۇرگىزىلدى. ماسەلەن، شىمكەنتتە جەدەل اقپاراتتى تەكسەرۋ بارىسىندا ۋنيۆەرسيتەتتەردىڭ بىرىنەن ءۇش ستۋدەنتتى ۇرلاۋ فاكتىسى انىقتالدى. تەكسەرىس بارىسىندا 20 جاستاعى التى جىگىت قىلمىسكەرلەردىڭ ىقپالىمەن بىرنەشە رەت ادام بوپسالاپ، وزگە دە قىلمىستار جاساعانى انىقتالدى. وسىنداي وقيعالاردىڭ بىرىندە ولار ءۇش ستۋدەنتتى اۆتوكولىككە وتىرعىزىپ، قالانىڭ سىرتىنا اپارعان، وندا ولار كۇش كورسەتىپ، موبيلدىك قوسىمشا ارقىلى ونلاين-نەسيە رەسىمدەتكەن جانە 700 مىڭ تەڭگەنى تارتىپ العان. توپتىڭ بارلىق قاتىسۋشىلارى ۇستالدى.

ال الماتى وبلىسىندا 23 جاسقا دەيىنگى ءۇش ادامنان قۇرىلعان توپ ۇستالدى. ولار 2005 -جىلى تۋعان قىزبەن كەلىسە وتىرىپ، ادامداردى الداپ پاتەرگە اپارىپ وتىرعان. وندا ولار جابىرلەنۋشىلەردى كۇش كورسەتەمىز دەپ قورقىتىپ، اقشا بوپسالاعان. كۇدىكتىلەر ۇستالىپ، سوتتىڭ سانكسياسىمەن قاماۋعا الىندى.

پاۆلودار وبلىسىنىڭ اقسۋ قالاسىندا بوپسالاۋ جانە الاياقتىق قىلمىستار جاساعانى ءۇشىن جاستار توبى ۇستالدى. توپ مۇشەلەرى قورقىتۋ جانە الداۋ ارقىلى جابىرلەنۋشىلەردى نەسيە رەسىمدەۋگە ماجبۇرلەگەن، كەيىننەن اقشا مەن تاۋارلاردى يەمدەنگەن. كۇدىكتىلەر ۇستالىپ، قاماۋعا الىندى.

اقمولا وبلىسىندا قىلمىستىق توپتىڭ ەكى مۇشەسى بۇرىن جەرگىلىكتى تۇرعىننان جارتى ميلليون تەڭگە بوپسالاعانى انىقتالدى. كۇدىكتىلەردىڭ ءبىرى 2005 -جىلى تۋعان جانە ۇقساس قىلمىستار جاساعانى ءۇشىن جازاسىن وتەپ جاتىر. ەكىنشى كۇدىكتى قاماۋعا الىنىپ، تەرگەۋ جۇرگىزىلۋدە.

اباي وبلىسىندا ستۋدەنتتەردى قورقىتۋ ارقىلى اقشا بوپسالاۋمەن اينالىسقان سەمەيلىك جاس تۇرعىنداردان قۇرالعان توپتىڭ قىلمىستىق ارەكەتى اشەكرەلەندى. جابىرلەنۋشىلەردىڭ ءبىرى - جەرگىلىكتى ۇنيۆەرسيتەتتىڭ ەكىنشى كۋرس ستۋدەنتى، وتكەن جىلدىڭ تامىز ايىنان باستاپ قاسكويلەرگە 700 مىڭنان استام تەڭگە بەرگەن. كۇدىكتى قاماۋعا الىندى. اتىراۋدا جاستار توبىنىڭ مۇشەسىنە قاتىستى جەدەل اقپاراتتى تەكسەرۋ ناتيجەلەرى بويىنشا ەكى شولاق مىلتىق جانە ءارتۇرلى كاليبرلى 60 پاترون تاركىلەندى. ول 2005 -جىلى تۋعان كوللەدج ستۋدەنتى، - دەدى ق ر ءى ءى م ۇيىمداسقان قىلمىسقا قارسى كۇرەس دەپارتامەنتىنىڭ باسقارما باستىعى قۋاندىق الپىس.

جاستار اراسىنداعى قىلمىستىڭ الدىن الۋ ىشكى ىستەر مينيسترلىگى باسشىلىعىنىڭ ەرەكشە باقىلاۋىندا تۇر.